Инклюзив таълим олаётган болажонлар учун «Янги йил саргузаштлари» деб номланган байрам дастури Алишер Навоий номидаги Ўзбек тили ва адабиёти университети “Психология ва социология” кафедраси томонидан ишлаб чиқилди.

Устозлар ва талаба-ёшлар бу ишга алоҳида масъулият билан ёндашиб, имконияти чекланган болажонлар учун дастур тайёрладилар. Саҳнадаги актёрлар ҳам руҳшунос талабалардир. Содда ва улар тушунадиган тилда воқеаларни ривожлантириб, қизиқарли, саргузаштларга бой саҳна кўриниши ва эртак қаҳрамонлари орқали эзгуликнинг ёвузлик устидан ғалабасини, атрофдагиларга доимо яхшилик улашиш кераклигини намойиш қилиб бердилар.  

Тошкент шаҳридаги 25-сонли илм маскани алоҳида таълимга эҳтиёжлари бўлган болажонлар учун ихтисослаштирилган бўлиб, Ўзбек тили ва адабиёти университети томонидан амалий-психологик ёрдам кўрсатиб келинади. Бу ерда ёш олимлар бола руҳиятини ўрганишлари баробарида, иклюзив таълимни такомиллаштириш борасида ҳам илмий изланишлар олиб боришади. Айнан шундай тадбирлар ўтказиш орқали ҳам тўпланган тажрибаларни келгусида ушбу йўналишдаги муассасаларда оммавийлаштиришга замин бўлади.

Болажонлар янги йил саргузаштларини мириқиб томоша қилганларидан сўнг, уларга университет жамоаси томонидан тайёрлаб қўйилган байрам совғалари улашилди.  

<iframe width="640" height="360" src="https://www.youtube.com/embed/VklPt8ZUZCM" title="Inklyuziv “Yangi yil”dasturi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Дониёр Якубов, Улуғбек Тўхтаев (видео), ЎзА