Bundan bir necha oy avval ko‘hna Marg‘ilonning “Uvaysiy” mahalla fuqarolar yig‘ini hududida “Omad far invest telekom” mas’uliyati cheklangan jamiyatiga qarashli “Happy kids” nodavlat maktabgacha ta’lim tashkiloti faoliyati yo‘lga qo‘yilgan edi.

150 nafar bolajonni o‘z bag‘riga olgan ushbu maskanga kelsangiz, uning ingliz tilini o‘rgatish  to‘garagida uzoq Afrikaning Keniya mamlakatidan kelgan mutaxassis  bilan bolajonlar ingliz tilida “biji- biji” qilishayotganini, yaxshiroq quloq tutsangiz,  bolajonlar biyrongina qilib  inglizcha so‘zlarni  talaffuz qilishga urinayotganini  kuzatish mumkin.

Jefferson Orina Onguti keniyalik bo‘lsada, qo‘shma shtatlarda bolalar psixologi mutaxassisligini o‘rgangan.

–Bolalar barcha joyda bir xil,  - deydi janob Jefferson. – Ular turli qiziqarli o‘yinlarni yaxshi ko‘radi. Biz  esa ularning ushbu qiziqishlaridan kelib chiqib, ta’lim va tarbiyasi bilan shug‘ullanishimiz lozim.  

Nodavlat bolalar bog‘chasidagi  shart-sharoitlarni yaratish, qolaversa, malakali mutaxassislar bilan nafaqat  davlat maktabgacha ta’lim tashkilotlari, balki xususiy sektordagi muassasalarni ham  to‘ldirish masalalari mahalliy hokimlik mutasaddilarining doimiy diqqat-e’tiborida.  Shu bois, bugun  ko‘hna Marg‘ilonda  maktabgacha ta’lim tashkilotlarining xususiy sektordagi  muassasalari soni viloyatdagi ko‘rsatkichlarning  eng yuqorisida.  

Muqimjon QODIROV (surat), O‘zA