“Arab News” нашрининг ёзишича, кеча Индонезиядаги денгизда йўловчи пароми ёниб кетган ва натижада уч киши ҳалок бўлган. Мамлакат фавқулодда хизмат ходимлари 560 дан ортиқ одам қутқарилганини маълум қилди.

Манадо ҳарбий-денгиз базаси адмирали Френки Сиҳомбингнинг сўзларига кўра, “KM Barcelona 5” якшанба куни тушда Талауд ороллари туманидаги Мелонгуане портидан Шимолий Сулавеси провинцияси маркази Манадо шаҳрига кетаётганда ёниб кетган.

– Қутқарув операциясига қирғоқ қўриқлаш кемалари ва бир нечта пуфлама қайиқлар жалб қилинган, - деди Сиҳомбинг.

Экипаж аъзолари кўплаб одамларни денгиздан олиб чиқиб, уларни яқин атрофдаги оролларга олиб кетишди, шунингдек, маҳаллий балиқчилар ҳам омон қолганларни қутқаришда кўмаклашган.

М.Пирматова, ЎзА