Индонезиянинг Суматра ороли ғарбий қисмида жойлашган Марапи тоғида вулқон уйғониб, 11 инсоннинг ҳаётига зомин бўлди. Қутқарувчилар омон қолган уч кишини топди, дея хабар берди “ВВС”.

Табиий офат ҳудудида бўлгани тахмин қилинаётган 12 кишининг тақдири эса номаълум. Хавфсизлик нуқтаи назаридан уларни қидириш тўхтатилган.

“Ҳозир қидирувни давом эттириш жуда хавфли”, дейди қутқарув гуруҳи вакили Жоди Харьяван.

Марапи вулқони кенг кўламли уйғониши 3 декабрь, якшанба куни тушдан кейин содир бўлди.

Маълумотга кўра, хавфли ҳудудда жами 75 киши бўлган. 49 киши эвакуация қилинди. Уларнинг кўпчилиги куйиш туфайли тиббий ёрдамга муҳтож.

Кул устуни қарийб 3 километр баландга отилган. Бир неча қишлоқни кул қоплаган. Вулқоннинг аниқ баландлиги 2891 метрни ташкил қилди.

Индонезия ҳукумати воқеа муносабати билан иккинчи даражали огоҳлантириш эълон қилди ва аҳолига кратерга 3 километрдан яқинроқ боришни тақиқлади.

Марапи Суматрадаги энг фаол вулқонлардан бири бўлиб, 1979 йил апрель ойида кузатилган энг ҳалокатли фожеада 60 киши қурбон бўлган эди.

18 минг оролдан иборат Индонезия архипелаги Тинч океанининг “Вулқонли олов ҳалқаси” деб аталадиган ҳудудда жойлашган. Бу зонада сейсмик фаоллик, деярли, тўхтамайди. Мамлакатда жами 127 та фаол вулқон мавжуд.