Индонезияның Ачех провинциясындағы түрмеден 50-ден астам тұтқын қашып кетті.

The Telegraph хабарлауынша, әлеуметтік желілерде тараған кадрларда ер адамдар темір торлардан асып өтіп, көшедегі саудагерлердің жанынан жүгіріп өтіп бара жатқаны көрінеді. 

Елдің батысындағы провинция тұрғындары қашқын тұтқындарды ұстауға тырысқан. Ресми мәліметтерге сәйкес, қазіргі таңда 28 тұтқын бостандықта жүр.

Тұтқындар тамақ үшін кезекте тұрған кезде қашып кеткен. Қазіргі уақытта Индонезия түрмелерінде күрделі мәселе туындаған – олардың көпшілігі қылмыскерлерге лық толы.

Өткен айда иммиграция және тәртіпті түзету мекемелері министрі Агус Андрианто елдегі түрмелердің 87 пайызы толып кеткенін ескерткен болатын. Ачехтегі оқиғадан кейін министр БАҚ-қа бұл түрме 100 адамға арналғанын, алайда қазір онда 368 тұтқын отырғанын мәлімдеді.

Жаза мерзімін өтеп жатқан тұтқындардың басым бөлігі есірткіге қатысты айыптармен сотталған. Қазір қашқындарды іздеу мақсатында барлық айналадағы аймақтар тексерілуде, ал ресми органдар бос жүрген тұтқындарды жаңа жазадан құтылу үшін өз еркімен берілуге шақырды.