Индонезияда шаҳар мэри COVID-19 тарқалиб кетгани учун шифокорлар қаршисида тиз чўкиб узр сўради
Шарқий Ява Индонезияда тарқалган коронавируснинг энг йирик ўчоғи ҳисобланади, вилоятда инфекция юқтирганларнинг ярми Сурабая шаҳрига тўғри келади.
Индонезиядаги Сурабая шаҳри мэри Три Рисмахарини шаҳарда COVID-19 инфекциясидан касалланиш ҳолатлари кескин ошиб кетгани ортидан юзага келган эпидемиологик вазият учун касалхона директори ва шифокорлар қаршисида тиз чўкиб йиғлади ва узр сўради. Jakarta Post газетасининг ёзишича, Сурабая Индонезияда коронавирус энг кўп тарқалган шаҳардир.
Нашрнинг маълум қилишича, Шарқий Ява вилоятининг маъмурий маркази бўлмиш Сурабая шаҳри мери Индонезия тиббиёт ассоциацияси ҳамда маҳаллий ҳокимият билан учрашув ўтказган ва коронавируснинг тарқалиб кетиши масаласини муҳокама этган.
Врач-пульмонолог мэр билан учрашувда ўзи ишлайдиган маҳаллий касалхона коронавирусга чалинган беморлар билан тўлиб кетгани ҳақида гапириб бергандан кейин шаҳар мэри шифокорлар қаршисида тиз чўкиб улардан узр сўраган.
Шарқий Ява Индонезияда тарқалган коронавируснинг энг йирик ўчоғи ҳисобланади, вилоятда инфекция юқтирганларнинг ярми Сурабая шаҳрига тўғри келади.