Индонезиянинг Марказий Ява музофотида содир бўлган кўчки ва сув тошқинлари оқибатида камида 16 киши ҳалок бўлди, 10 киши жароҳат олди. Бу ҳақда “Al Jazeera” нашри маълум қилмоқда.

Маҳаллий "Компас ТВ" телеканали кўчкидан катта зарар кўрган уйларни кўрсатди. Лойга ботган бир қанча машиналар ҳам тасвирда муҳрланган.

Пекалонган полицияси бошлиғи Дони Пракосо маҳаллий "Метро" телеканалига берган интервьюсида қутқарувчилар ҳали ҳам бедарак йўқолган камида беш кишини топишга ҳаракат қилишаётганини айтди.

Марказий Ява табиий офатларни бошқариш агентлиги матбуот котиби Бергас Катурсаси Пенанггунганнинг айтишича, ҳудудга кириш имкони бўлмагани учун қидирув ишлари кечиктирилган.

Унинг таъкидлашича, кўнгиллилар гуруҳи ҳам қидирув ишларига кўмаклашмоқда.