“Ассошиэйтед Пресс” агентлиги хабар беришича, кеча Индонезиянинг Маланг шаҳрида жойлашган стадионда футбол ўйини тугаши билан тартибсизлик юзага келган.

Маҳаллий "Арема Кронус" клуби "Персебая" жамоасига 2:3 ҳисобида мағлуб бўлган. Томошабинлар ўйинчилар ва ҳакамга норозилик билдириш мақсадида майдонга шиша идиш ва бошқа турли жисмларни улоқтира бошлаган.

Мазкур ҳаракат стадион ташқарисига ҳам тарқалган, "Арема Кронус" мухлислари камида бешта полиция машинасини ёқиб юборгани айтилмоқда. Дастлабки маълумотга кўра, 127 фуқаро қурбон бўлгани эълон қилинганди. Ҳозиргина айни кўрсаткич 174 га етгани тўғрисида янги хабар берилди.

Полиция вазиятни барқарорлаштириш учун кўздан ёш оқизувчи газ ишлатишга мажбур бўлган. Жароҳатланганлар сони 300 дан зиёд эди, уларнинг аксари касалхонага кетар чоғида ҳаётдан кўз юмган. Айни пайт юздан ортиқ киши даволаняпти.

Индонезия Президенти Жоко Видодо якшанба куни телевидение орқали қилган мурожаатида ҳалок бўлган фуқароларнинг оила аъзоларига ҳамдардлик билдирди. У хавфсизлик билан боғлиқ вазият баҳолангунга қадар мамлакат футбол чемпионати тўхтатиб турилишини билдирди.
Давлат раҳбари, шунингдек, спорт вазири, полиция раҳбарияти ва Индонезия футбол ассоциациясига мамлакатда футбол ўйинларини ташкил этиш бўйича комплекс аудит ўтказишни буюрган.

Айтганча, Индонезия 2023 йил 20 майдан 11 июнга қадар футбол бўйича ёшлар ўртасидаги жаҳон чемпионатига мезбонлик қилиши режалаштирилган.

Б.Худойбердиев, ЎзА