Yurtimizda aholini, ayniqsa, yoshlarni sportga keng jalb etish bo‘yicha izchil islohotlar amalga oshirilmoqda. Sport-ta’lim muassasalarida olimpiya va paralimpiya sport turlari bo‘yicha sportchilarni tayyorlash va ularni davlat tomonidan qo‘llab-quvvatlash, sport-ta’lim muassasalari faoliyatini yangi bosqichga ko‘tarishga alohida e’tibor qaratilmoqda.

Shu bilan birga, sport-ta’lim muassasalarini zamonaviy sport kiyimlari, ekipirovkalar, oyoq kiyimlari, sport anjomlari, sport jihozlari hamda uskunalari bilan ta’minlash, soha mutaxassislarini tayyorlash hamda o‘tkazilayotgan musobaqalar saviyasini yuksaltirish kabi masalalar dolzarb vazifalardan biri bo‘lib qolmoqda.    

Endilikda xorijdan olib kelinadigan, O‘zbekistonda ishlab chiqarilmaydigan, sport-ta’lim muassasasi tomonidan olib kiriladigan sport kiyimlari, ekipirovkalari, oyoq kiyimlari, sport anjomlari, jihozlari hamda uskunalarini olib kirishda bojxona bojidan ozod etish ko‘zda tutilmoqda.  

Bu imtiyozlar belgilangan tartibda shakllantirilgan ro‘yxat asosida import qilinadigan tovarlarning 50 foiziga nisbatan beriladi.    

“O‘zbekiston Respublikasining Bojxona kodeksiga qo‘shimcha kiritish to‘g‘risida”gi qonun loyihasiga ko‘ra, Bojxona kodeksining 297-moddasi ikkinchi qismi 15-band bilan to‘ldirilib, yuqoridagi imtiyozlar aks etmoqda. Ushbu qonun loyihasi Oliy Majlis Qonunchilik palatasining majlisida birinchi o‘qishda ko‘rib chiqilib, qizg‘in muhokama qilindi.    

Ta’kidlanganidek, ushbu qonun loyihasining qabul qilinishi jismoniy tarbiya va sport sohasida ta’lim xizmatlari ko‘rsatish faoliyatini rivojlantirishga, iqtidorli sportchilarni saralash va ularni tayyorlashda davlat va nodavlat ta’lim muassasalari o‘rtasida sog‘lom raqobat muhitini, shuningdek, sport-ta’lim muassasalari uchun shart-sharoitlar yaratilishiga xizmat qiladi.  

Muhtarama Komilova, O‘zA