Андижон шаҳридаги Экопаркда “Имкониятлар дунёси” деб номланган маданий-маърифий, кўргазмали тадбир бўлиб ўтди.

Ўзбекистон Республикаси давлат мустақиллигининг ўттиз уч йиллик байрами олдидан Ижтимоий ҳимоя миллий агентлиги вилоят бошқармаси ташаббуси билан ўтказилган тадбирда Агентлик тасарруфидаги ташкилот ва муассасаларда тарбияланаётган болажонлар, ишчи ходимлар, кенг жамоатчилик вакиллари иштирок этди. 

Мамлакатимизда кейинги йилларда ногиронлиги бўлган шахсларни ҳар томонлама қўллаб-қувватлаш, уларнинг салоҳият ва имкониятларини тўғри баҳолаган ҳолда инклюзив ёндашувни татбиқ қилиш ҳамда ижтимоий фаоллигини ошириш, тенг ҳуқуқлигини таъминлашга қаратилган кенг кўламли ишлар олиб борилмоқда. 

Айниқса, жисмоний имконияти чекланган, ногиронлиги бўлган болаларнинг ёшлигидан бошлаб соғлиги, таълим олиши, имконият ва иқтидоридан келиб чиқиб, уларга сифатли хизматлар кўрсатиш, инклюзив таълимга бўлган эҳтиёжларини қондириш масалаларига алоҳида эътибор қаратилмоқда. 

[gallery-18890]

–Мактабимимзда 186 нафар кўзи ожиз ёки кўришда нуқсони бўлган болалар тарбияланади, – дейди Асака туманидаги 16- сон “Нурли маскан” мактаб-интернати тарбиячиси Дилера Юсупова. – Масканимизда болажонларнинг яшаши, таълим олиши учун барча шароит яратилган. Махсус, брайль алифбосидаги китоблар билан таъминланган кутубхона, шунингдек, инглиз тили, косиблик, тўқувчилик сингар қатор тўгараклар орқали болалар ўзлари қизиққан йўналишларда имкониятларини юзага чиқармоқда.

Тадбирда имконияти чекланган болалар томонидан тайёрланган қўл меҳнати маҳсулотлари кўргазмаси ташкил этилди. Уларнинг истеъдод ва маҳоратларини юзага чиқаришга қаратилган танловлар, спорт мусобақалари ўтказилди. 

Кўргазмаларда намойиш этилган ранг-баранг расмлар, сувинер гуллар, миллий қўғирчоқлар, қўйингки, ҳунармандчиликнинг бошқа йўналишларида жисмоний имконияти чекланган болалар томонидан тайёрланган қўл меҳнати маҳсулотлари тадбир қатнашчиларида ёрқин таассуротлар қолдирди. 

Тадбир давомида муассаса ва ташкилотлар жамоалари ўзларининг кўнгилочар чиқишлари билан иштирок этди. Санъаткорлар томонидан намойиш этилган бадиий дастур барчага хуш ва байрамона кайфият улашди. 

<iframe width="650" height="420" src="https://www.youtube.com/embed/tpu_AtTmkk4" title="“Imkoniyatlar dunyosi” imkoniyati cheklangan bolalarning imkoniyatlarini yuzaga chiqardi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ф. Убайдуллаев, З. Умрзоқов (сурат), ЎзА мухбирлари