Халқаро шахмат федерацияси имконияти чекланган инсонлар ўртасида иккинчи бор ўтадиган Бутунжаҳон шахмат олимпиадасида қатнашадиган жамоалар рўйхатини эълон қилди.

Унга кўра, Қозоғистон пойтахти Остонада ташкил этиладиган мазкур нуфузли мусобақада 4 та қитъанинг 35 та миллий терма жамоалари қатнашиши тасдиқланди.

Бутунжаҳон шахмат олимпиадаси мезбони Қозоғистон иккита жамоа билан баҳсларда қатнашса, Европа қитъасидан Польша, Венгрия, Исроил, Украина, Германия, Хорватия, Чехия, Шимолий Македония, Сербия, Осиё қитъасидан ФИДЕ жамоаси, Филиппин, Ҳиндистон, Бангладеш, Мьянма, Ўзбекистон, Бирлашган Араб Амирликлари, Америка қитъасидан Куба, Венесуэла, Аргентина, Колумбия, АҚШ, Чили, Панама, Африка қитъасидан Миср, Замбия, Зимбабве, Уганда, Кения мамлакатларининг матонат ва ирода соҳиби бўлган шахматчилари дона суради.

Шунингдек, жорий йилнинг 19-26 октябрь кунлари ўтадиган мусобақаларда бир қатор халқаро ногиронлар ташкилотлари ҳам биттадан алоҳида жамоа билан олимпиадада қатнашиш талабномаларини тақдим этган.

Эслатиб ўтамиз, имконияти чекланганлар ўртасида 2023 йил Сербия пойтахти Белградда ташкил этилган Биринчи шахмат олимпиадасида Ўзбекистон терма жамоаси 6-ўринни эгаллаган эди.

Т.Рўзиев,

ЎзА