Мобиль қурилмани харид қилиб олгандан сўнг унинг IMEI кодлари билан боғлиқ муаммолар юзага келиш ҳолатларининг олдини олиш, харидорга ўз вақтида тегишли маълумот бериш учун UZIMEI тизимининг расмий веб сайти, SMS ёки USSD сўровлар ёрдамида харид қилинаётган мобиль қурилманинг IMEI кодини текшириш билан унинг қандай йўл билан рўйхатдан ўтганлигини аниқлаш имконияти яратилди.

Яъни сотиб олинган мобиль қурилма IMEI кодини текширганингизда икки турдаги жавобни олишингиз мумкин бўлади ;

1.  Сиз мобиль қурилма сотиб олишингиздан олдин унинг IMEI кодини UZIMEI.UZ расмий веб сайти, SMS ёки USSD сўровлар ёрдамида текширганингизда қуйидаги расмда кўрсатилган жавоб берилса, ушбу мобиль қурилмани сотиб олиш тавсия этилади ҳамда ушбу мобил қурилма Ўзбекистон худудига сотиш учун расмий олиб кирилган ҳисобланади:

  2.  Сиз мобил қурилма сотиб олишингиздан олдин унинг IMEI кодини UZIMEI.UZ расмий веб-сайти, SMS ёки USSD сўровлар ёрдамида текширганизда қуйидаги расмда кўрсатилган жавоб берилса, ушбу мобиль қурилмани сотиб олиш тавсия этилмайди, бу мобиль қурилма жисмоний шахснинг паспорт маълумотлари ёрдамида шахсий фойдаланиш учун рўйхатдан ўтказилган ҳамда паспорт эгасининг мурожатига асосан тизимдан ўчирилиши мумкин:        

Тизим оператори сизнинг мобиль қурилмангизни рўйхатдан ўтказишни тавсия қиладиган расмий хизмат кўрсатиш пунктлари ҳақида батафсилроқ гаплашмоқчимиз.

  Сиз UZIMEI марказий офисида мобиль қурилмангизни текшириб рўйхатдан ўтказишингиз мумкин, бундан ташқари уяли алоқа операторлари IMEI кодларини рўйхатга олиш ишлари UzMobile, Ucell, MOBIUZ  алоқа операторлари томонидан барча расмий нуқталарида, почта бўлимларида ҳамда uzimei.uz. сайти орқали рўйхатдан ўтказилмоқда.

  Истеъмолчиларга қулайлик яратиш мақсадида ҳозир Қорақалпоғистон Республикаси, барча вилоятлар ва Тошкент шаҳрида мобиль қурилмаларнинг IMEI кодларини рўйхатдан ўтказиш пунктлари мавжуд. Тизим оператори мамлакатимизнинг барча ҳудудларида хизмат кўрсатиш шохобчаларини очишда давом этмоқда.

  Бир ойдан буён мамлакатимиздаги энг йирик савдо мажмуаларидан бири бўлган “Малика” бозорида тизим операторининг пункти фаолият юритиб келмоқда. Савдо мажмуасига келган ҳар қандай харидор мобиль қурилмани сотиб олишдан олдин IMEI коди рўйхатдан ўтганлиги ёки ўтмаганлигини текшириши мумкин, кимни номидан рўйхатдан ўтганлиги (бировнинг паспорт маълумотларига),  расмий равишда импорт қилинганлиги тўғрисида маълумотларни олиши мумкин. Бу хизматлардан фуқаролар “Малика” мажмуасидан чиқмаган ҳолда  фойдаланиши мумкин.  

  Эслатиб ўтамиз: истеъмолчи (харидор) рўйхатдан ўтиш жараёни билан шуғулланмаслиги ва рўйхатдга олиш учун тўловни амалга оширмаслиги керак.

  Рўйхатга олиш учун жавобгарлик истеъмолчи (харидор)га эмас, импортёр (сотувчи)га тушади.

  Сиз ўзингиз билан хориждан олиб келинган (ёки почта жўнатмаси орқали олинган) шахсий мобиль қурилмаларни фақат UZIMEI тизимининг расмий рўйхатдан ўтиш пунктларида рўйхатдан ўтказишингизни тавсия этамиз.

Маълумот учун: 2018 йилда мамлакатимизга расмий равишда 13,5 мингта мобиль қурилма импорт қилинган бўлса, 2019 йилда бу кўрсаткич 40 баробарга, 2020 йилда эса 111 баробарга ошган.  Жорий йилнинг 6 ойида ушбу кўрсаткич 850 мингдан ошди.

ЎзА