Технология оламида яна бир шов-шувли воқеа рўй берди. Илон Маск ўзининг xAI компанияси ва X ижтимоий тармоғи орқали Apple ва OpenAI’ни судга берди. Уларнинг айтишича, Apple ва OpenAI “инсофсиз рақобат” ва “тил бириктириш” орқали сунъий интеллект бозорида монополияни мустаҳкамлашга уринаётгани айтилмоқда.

Даъво Texas штатининг шимолий судида кўриб чиқилади. Масалан, ChatGPT’нинг iOS тизимига интеграция қилиниши фойдаланувчиларнинг танлаш имкониятини чеклагани айтилмоқда. Маск томонидан билдирилган даъволарга кўра, бу ташаббус Apple ва OpenAI’га қўл келаётгани, лекин бошқа сунъий интеллект ишлаб чиқарувчилар йўлига тўсиқ бўлаётгани таъкидланмоқда.

Маск, шунингдек, App Store рейтингларини манипуляция қилишда ҳам Apple’ни айбламоқда. Унинг фикрича, компания атайлаб OpenAI иловаларига устунлик бериб, рақобатчилар – жумладан унинг ўз Grok чат-ботини – “зарур” дастурлар рўйхатидан четда қолдирмоқда.

Бу орада OpenAI раҳбари Sem Altman Маскнинг даъволарига жавобан, “Илон X платформасидан шахсий манфаатлари учун фойдаланаётган бўлиши мумкин” деди. Аммо унинг жамоаси “ажойиб маҳсулотлар яратишга” эътибор қаратишини таъкидлади.

Қизиқ томони – ҳозирда ChatGPT АҚШ App Store’ида биринчи ўринда, Маскнинг Grok’и эса олтинчи ўринда турибди. Apple ва OpenAI ҳамкорлиги эса янада чуқурлашмоқда: яқинлашиб келаётган iOS 26 тизимида GPT-5 Apple Intelligence’га ўрнатилиши режалаштирилган.

Шундай қилиб, технология гигантлари ўртасидаги рақобат энди суд майдонига кўчмоқда. Бу жараён охир-оқибат ким фойдасига ишлашини эса вақт кўрсатади.

<iframe width="463" height="823" src="https://www.youtube.com/embed/LQFn3qP-gJA" title="Ilon Mask, Apple va OpenAI – raqobat maydonida yangi jang!" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нозим Мардонов, Дониёр Якубов, ЎзА