Илмий ғоялар амалий ҳаётга татбиқ этилмас экан, уларнинг қиймати тўлиқ намоён бўлмайди. Шу маънода, олимлар ва ишбилармонлар ўртасидаги мулоқот нафақат иқтисодий, балки интеллектуал ривожланишнинг ҳам муҳим жиҳати ҳисобланади.

Тошкент шаҳрида Ўзбекистон Савдо-саноат палатаси ташаббуси билан олимлар ва тадбиркорлар учрашуви бўлиб ўтди. Тадбирда Фанлар академияси, Олий таълим, фан ва инновациялар вазирлиги ҳузуридаги Инновацион ривожланиш агентлиги, тадбиркорлик ва ишлаб чиқариш соҳаси вакиллари иштирок этдилар.

Учрашув илм-фан ютуқларини ишлаб чиқариш ва тадбиркорлик фаолиятига жорий этиш, илмий ғояларнинг амалий қийматини ошириш ҳамда бизнес билан ҳамкорликни кучайтиришга қаратилди.

Мулоқот фармацевтика, электротехника, қурилиш, автомобилсозлик, транспорт ва логистика йўналишларини қамраб олди. Тадбир давомида инновацион ғоялар, илмий ишланмаларни тижорийлаштириш, инвестиция жалб қилиш ҳамда уларни амалиётга жорий этиш механизмлари муҳокама қилинди.

Мазкур учрашув илм-фан ва тадбиркорлик ўртасидаги ҳамкорликни янги босқичга кўтариб, маҳаллий инновацияларни қўллаб-қувватлаш ҳамда миллий ишлаб чиқариш салоҳиятини юксалтиришга хизмат қилди.

Нигора Раҳмонова, ЎзА