Bugun oliy ta’lim tizimida raqobat nafaqat auditoriyalar yoki reytinglar, balki xalqaro maydondagi hamkorlik ko‘lami bilan ham o‘lchanadi. Shu ma’noda, Jizzakh Sambhram Universityda Óbuda University rektori, professor Kovach Leventening tashrifi oddiy protokol tadbiri emas, balki strategik ahamiyatga ega voqelik sifatida namoyon bo‘ldi.

Zamonaviy ta’lim global integratsiyasiz taraqqiy etmaydi. Ilmiy tadqiqotlar, innovatsion ishlanmalar, akademik almashinuv dasturlari — bularning barchasi xalqaro sheriklik orqali yangi sifat bosqichiga ko‘tariladi. Budapeshtda joylashgan nufuzli universitet rahbarining Jizzaxga tashrifi ikki oliygoh o‘rtasidagi munosabatlarni rasmiylashtirishdan ko‘ra kengroq ma’no kasb etdi. Bu — tajriba almashish, ilmiy maktablar o‘rtasida bog‘liqlikni kuchaytirish va ta’lim mazmunini xalqaro standartlar asosida boyitish imkoniyatidir.

Professor Kovach Levente — elektr va biomeditsina muhandisligi, boshqaruv nazariyasi sohasida xalqaro miqyosda tan olingan olim. Ilmiy markaz tashkil etgani va universitet rahbari sifatidagi tajribasi uni strategik fikrlovchi akademik lider sifatida namoyon etadi.

[gallery-27959]

— Bugun universitetlar yopiq tizimda rivojlana olmaydi. Ilm-fan chegara tan olmaydi, shuning uchun hamkorlik — tanlov emas, ehtiyojdir, — dedi  xorijlik professor.— Jizzaxda biz faqat memorandum imzolashni emas, balki qo‘shma tadqiqotlar, talabalar va professor-o‘qituvchilar almashinuvi orqali aniq natija beradigan sheriklikni yo‘lga qo‘yishni maqsad qilyapmiz. Ayniqsa, muhandislik va sog‘liqni saqlash sohalarida innovatsion loyihalarni birgalikda amalga oshirish imkoniyati katta. Bu hamkorlik har ikki universitetning xalqaro akademik maydondagi nufuzini mustahkamlaydi.

O‘zaro anglashuv memorandumini imzolash rejasi qo‘shma ilmiy loyihalar, akademik almashinuv va innovatsion dasturlarni joriy etish imkoniyatlarini kengaytiradi. Bu ta’lim sifatini oshirish, ilmiy izlanishlarni xalqaro darajaga olib chiqish va yosh tadqiqotchilar uchun yangi maydon yaratishga xizmat qiladi. Eng muhimi, bu jarayon universitetning global akademik tarmoqlardagi ishtirokini kuchaytiradi.

Universitet kengashi tomonidan professorga “Faxriy doktor” unvonini berish tashabbusi ilmiy ehtirom ifodasi bo‘lish bilan birga, strategik sheriklikni mustahkamlashga qaratilgan qadamdir. Bu qaror ramziy emas, balki uzoq muddatli hamkorlikni institutsionallashtirishga xizmat qiladigan amaliy qadam sifatida ahamiyat kasb etadi.

Xulosa qilib aytganda, mazkur tashrif universitet tarixidagi navbatdagi protokol tadbiri emas. U — ilm-fan diplomatiyasi orqali yangi imkoniyatlar eshigini ochishga qaratilgan ongli va istiqbolli qadamdir.

A. Qayumov, J. Yorbekov (surat), O‘zA muxbirlari