Iqtisodiyot va opera. Aql va qalb. Raqam va ohang. Bir qarashda ikki xil olam. Lekin aslida — bitta yo‘l: ma’rifat, kamolot, kelajak.

Bugun bu ikki olamda qadam qo‘yayotgan ikki qiz bor — jiyanim Mubinaxon Mirzayeva va qizim Mumtozbegim Ochilova. Ular turli yo‘lda harakat qilayotgan bo‘lsa ham, maqsadlari uyg‘un: orzudan maqsadga olib boruvchi yo‘lda ezgulik va mas’uliyat bilan olg‘a qadam qo‘ymoqda.

Mubinaxon 20 yoshda. AQSHning Missisippi shtatidagi mashhur University of Mississippi (Ole Miss) universitetida bakalavr darajasini olish arafasida. Bu yillar uning hayotida eng sermazmun, eng mas’uliyatli davr bo‘ldi.

Iqtisodiyot faqat raqamlardan iborat emas. Bu — qaror, javobgarlik va jamiyat taqdiri. Mubinaxon ana shu og‘ir, lekin sharafli yo‘lni tanladi. Ole Miss uning fikr olamini kengaytirdi, jamiyatga daxldorlik va tanqidiy tafakkurni o‘rgatdi. Shu muhit uni nafaqat bilim, balki dunyoqarash bilan boyitdi.

Mumtozbegim esa San-Fransisko musiqa konservatoriyasida opera yo‘nalishida tahsil olmoqda. San’at — bu jasorat. Sahna orqali qalblarga ezgulik ulashish, ovoz orqali taqdirlarni so‘zlash har kimning qo‘lidan kelmaydi. Yaqin kunlarda u katta opera sahnasida ilk bor bosh rolni ijro etadi — bu bolalik orzusining amalga oshishi va mehnat samarasining namoyon bo‘lishi.

Iqtisodiyot jamiyatning tanasini tiklaydi, san’at esa ruhini saqlaydi. Ana shu uyg‘unlik millatning kelajagini belgilaydi.

Mubinaxon va Mumtozbegim nafaqat qarindosh, balki chinakam do‘st. Bir-birini tushunadi, qo‘llab-quvvatlaydi, ilhomlantiradi. Ularning do‘stligini ko‘rganda yuragim quvonchga to‘ladi — bugungi kunda chin do‘stlik ham eng katta boyliklardan biri.

Har yili qishki ta’tilda ular Chikagoga, akasi Jasurjon xonadoniga kelishadi. Bu yil ham taqdir bizga sovg‘a qildi: qishki ta’tilni qizim va jiyanim bilan birga o‘tkazish nasib etdi. Qorli Chikago, yorug‘ kechalar va xotiralar — ular umrlar davomida yodda qoladi.

Mubinaxonning ta’limiga oilaviy qo‘llab-quvvatlash orqali haqiqiy investitsiya kiritilmoqda. Bu — faqat moddiy yordam emas, bu — ilmga ishonch, kelajakka sarmoya. Bir qizaloq taqdiriga qo‘yilgan bu sarmoya aslida, mamlakat ertangi kuniga qo‘yilgan hissadir.

Bugun Mubinaxon diplom olish arafasida, Mumtozbegim esa opera sahnasi ostonasida turibdi. Ikkisi ham hayajonda.

Iqtisodiyot va san’at, aql va qalb, mantiq va ohang — ular bir-birini to‘ldiradi. Ana shu uyg‘unlik — Yangi O‘zbekistonning kelajak portreti.

Bunday bilimli, ma’rifatli va jasur yoshlar bilan kelajak quriladi. Ular faqat orzu emas, ular — ishonch va umid.

Mubinaxonga ham, Mumtozbegimga ham yo‘l ochiq bo‘lsin. Orzulari maqsadga, maqsadlari taqdirga aylansin. Chunki bu ikki qiz — ikki orzu emas. Bu — bir kelajak.

Gulchehra Mirzayeva, O‘zA