Аввал хабар берганимиздек, 27 ноябрь куни Швейцариянинг Лозанна шаҳрида Халқаро қиличбозлик федерацияси (FIE)нинг навбатдаги ҳисобот-сайлов конгрессида Ўзбекистон миллий олимпия қўмитаси раиси Рустам Шоабдурахмонов раҳбарлигидаги мамлакатимиз спорт делегацияси иштирок этди.

Конгресс давомида мамлакатимиз спорт делегацияси Халқаро олимпия қўмитаси президенти Томас Бах ва бир қатор халқаро спорт ташкилотларининг раҳбарлари билан мулоқот ўтказди, дея хабар бермоқда Миллий олимпия қўмитаси матбуот хизмати.

Учрашувларда Томас Бах ва бошқа халқаро спорт мутахассислари мамлакатимизда олимпизм ғояларини ривожлантириш борасида олиб борилаётган ишларга юксак баҳо бериб, Ўзбекистон кейинги йилларда бир қатор спорт турлари бўйича жаҳон спортининг марказига айланаётганлигини таъкидлашди.

Жумладан, Тошкентда қиличбозлик, самбо, яккакураш спорт турларида ўтган мусобақалар, семинарлар, ўқув-машғулотлари ва яқин кунларда оғир атлетика бўйича ташкил этиладиган жаҳон чемпионати Ўзбекистонни жаҳон спорт оламининг эътибор марказида бўлаётганлигидан далолат эканлиги эътироф этилди.  

Аҳамиятлиси, FIE конгрессидаги сайлов якунларига кўра, ҳамюртларимиз ҳам Халқаро қиличбозлик федерациясининг бир қатор бўлимларидан жой эгаллади. Хусусан, Ўзбекистон қиличбозлик федерацияси бош котиби Гулнора Саидова FIEнинг тарғибот қўмитасига, Токио-2020 олимпиадасида ҳакамлик қилган юртдошимиз Аида Ҳасанова ҳакамлар қўмитаси таркибига кирди.  

Тадбирда конгресс дастурига биноан 2023 йилги жаҳон чемпионати мезбонлигига даъвогар Тошкент, Дубай ва Милан шаҳарларининг тақдимоти ўтказилди. Унда 2023 йилги чемпионатни Ўзбекистонда ўтказиш масаласи кўпчиликда катта қизиқиш уйғотган бўлса-да, овоз бериш натижасида Италиянинг Милан шаҳри Тошкент ва Дубайдан кўпроқ овоз олган ҳолда жаҳон чемпионати мезбонлигини қўлга киритди.

Эслатиб ўтамиз, Халқаро қиличбозлик федерациясининг ҳисобот-сайлов конгрессида Алишер Усмонов бир овоздан кейинги тўрт йиллик муддатга FIE президентлигига қайта сайланди.

Тўлқин Рўзиев, ЎзА