Шарқий Хитой денгизида яна можаро келиб чиқди, деб ёзмоқда “BBC” нашри. Таъкидланишича, ХХР томони япон балиқчи кемаси Диаою ороллари ҳудудига ноқонуний кирганини, Япония эса аксинча, иккита Хитой қўриқлаш кемаси мамлакат сувларида “берухсат сайр қилган”ини даво қилган.

Мазкур келишмовчилик сўнгги ҳафталарда икки ўлка ўртасида дипломатик кескинлик кучайган бир пайтда юз бермоқда. Япония бош вазири Санаэ Такаитининг “Тайванга қарши эҳтимолий ҳужум бўлса, Токио ҳарбий жавоб қайтариши мумкин”, дея янграган баёноти Пекинда норозилик уйғотди.

Таъкидлаш жоиз, Диаою оролларида аҳоли истиқомат қилмайди, аммо у жой стратегик жиҳатдан муҳим ҳудуд ҳисобланади. 

Экспертлар фикрича, сўнгги пайтларда ХХР бу ерга тобора кўпроқ ҳарбий кемаларини юбориб, Токио ҳимоясини синовдан ўтказаётгандек кўринмоқда. Олдин ҳам бунга ўхшаш вазиятлар кўп учраган, масалан 2023 йилда Хитой кемалари мазкур ҳудудда рекорд даражада кўп марта кўзга ташланган.

Ҳодисанинг тафсилотлари икки давлат томонидан турлича талқин қилинмоқда, аммо бир нарса кундек равшан: Шарқий Хитой денгизида ҳарбий-сиёсий кескинлик энг юқори даражада. Бу эса нафақат Токио ва Пекин, балки бутун минтақа хавфсизлиги учун янги муаммолар туғдириши мумкин.

Мусулмон Зиё, ЎзА