ИИВ Тезкор-қидирув департаменти одам савдосига қарши курашиш бўйича изчил ишларни амалга оширмоқда.

Навбатдаги тадбирда Малайзиянинг Куала-Лумпур шаҳрида одам савдоси жиноятини содир этиб келаётган уюшган жиноий гуруҳ аъзоларини аниқлаш бўйича тезкор тадбир ўтказилди.

1971 йил Тожикистон Республикасида туғилган аёл мазкур уюшган жиноий гуруҳга раҳбарлик қилиб, ўзининг Ўзбекистонда яшовчи жиноий шериклари орқали телеграм тармоғида “Куала-Лумпур шаҳридаги ресторанга янги ходимларни ишга оламиз” сарлавҳаси остида эълон жойлаб келган.  

Уларга мурожаат қилган шахслар билан гуруҳнинг Тошкентдаги аъзолари учрашиб, турли хил ёлғон ваъдалар билан уларни Куала-Лумпурга жўнатиш билан шуғулланиб келган.

Тезкор тадбир давомида Тожикистон фуқароси бўлган аёл қўл остида ишлаш учун келган қизларни шаҳвоний эксплуатацияга мажбурлаган.  

Ёлғон ваъдаларга ишониб борган йигитларнинг эса фуқаролик паспортларини олиб қўйиб, ўзлари мажбурий меҳнатга жалб қилинган.  

“500 АҚШ доллари миқдоридаги ойлик маош, бепул турар-жой, тўрт маҳал озиқ-овқат билан таъминлаш” каби ваъдаларнинг ҳаммаси ёлғон бўлиб чиққан.

Ишчи визасини ололмаган йигитлар, табиийки, ҳеч қандай иш ҳақи ҳам олмаган.

Шу вақтга қадар ушбу жиноий гуруҳдан жабр кўрган 8 нафар шахс аниқланиб, ҳолат юзасидан Жиноят кодексининг 135-моддаси 2-қисми билан жиноят иши қўзғатилди ва тергов ҳаракатлари олиб борилмоқда.

Мазкур департаментнинг ҳудудий бўлинмалари ДХХ ва  ДБҚ  ходимлари ҳамкорликда катта миқдордаги гиёҳвандлик воситалари контрабандасига чек қўйди.  

Андижон вилояти Бўстон тумани ҳудудида жойлашган дала майдонига кўмиб кетилган 9 кг. 447 гр. (гашиш) гиёҳвандлик воситасини олган вақтида 1990, 1996, 1980, 1981 йилларда туғилган уюшган гуруҳ аъзолари тезкор-тадбир иштирокчилари томонидан қўлга олинди.  

Аниқланишича, трансмиллий жиноий уюшманинг Ўзбекистондаги ташкилотчиларидан бўлган шахс Қирғизистонда яшовчи фуқаронинг кўрсатмасига асосан юқоридаги геолокациядан гиёҳвандлик воситаларини олиб, бошқа  ҳудудларга тарқатиши лозим бўлган.  

Ўтказилган тезкор тадбир натижасида 94 минг 470 дона бир марталик дозага тенг бўлган гиёҳвандлик воситаси тарқалишининг олди олинди.

Мазкур ҳолат юзасидан ушбу жиноий гуруҳга нисбатан Жиноят кодексининг 273-моддаси 5-қисмига асосан 10 йилдан 20 йилгача озодликдан маҳрум қилиш жазоси қўлланилиши назарда тутилган.

Наркожиноятларни эрта аниқлаш ҳамда уларнинг олдини олишдаги тезкор қидирув тадбирлари кучайтирилган тартибда давом эттирилмоқда.  

Норгул Абдураимова, ЎзА