Халқаро футбол тарихи ва статистикаси федерацияси – IFFHS клубларнинг ўтган 2022 йилдаги рейтингини тузиб, жаҳондаги профессионал футбол клублари рейтинг баллари бўйича ўринларни эълон қилди.

Унда етакчи сифатида Бразилиянинг “Фламенго” жамоаси кўрсатилган. Аввалги 2021 йили бу ўрин Бразилиянинг бошқа бир вакили “Палмейрас”га насиб этган бўлиб, улар бу сафар 2-ўринда қайд этилган. Кучли учликка Англиянинг “Ливерпуль” клуби якун ясаган.

Осиё футбол конфедерациядагилар орасида етакчи сифатида Жанубий Кореянинг “Чонбук Хёндэ Моторс” клуби (42-ўрин) қайд этилган.

Шунингдек, рейтингда Ўзбекистон суперлигасидан уч клуб киритилган бўлиб, етакчилик Қаршининг “Насаф” жамоасида. Рўзиқул Бердиев жамоаси 87 балл билан жаҳон клублари орасида 183-ўринда қайд этилган.  

Жиззахнинг “Сўғдиёна” клуби 71,5 балл тўплаб, 249-ўринда қайд этилган.

Ўзбекистоннинг амалдаги чемпиони – Тошкентнинг “Пахтакор” жамоаси эса 57 рейтинг балли билан 390-ўриндан жой олган.

А.Қаюмов, ЎзА