"BoxingScene" нашри ҳамюртимиз Муроджон Аҳмадалиев барча чемпионлик камарларини бирлаштирувчи жангга эришиши учун ўзига тегишли WBA ва IBF камарларини ҳимоя қилиши лозимлиги хусусидаги ахборотни тарқатди.

Жангларни жорий йил 2 февралгача  камида бир марта ўтказиши белгилаб қўйилди.  

Маълумотда айтилишича, Халқаро бокс федерацияси (IBF) томонидан илгари сурилган кўрсатмага биноан, Муроджон Аҳмадалиев мажбурий даъвогар – филиппинлик Марлон Тапалесга қарши рингга кўтарилиши керак.

Мазкур жанг масаласида Аҳмадалиев ва Тапалеснинг промуотерлик компаниялари қисқа фурсатда келишувга эришиши лозим.

Хабар берганимиздек, Муроджон ўтган йилнинг ноябрь ойида АҚШда Хосе Веласкесга қарши ўтказган сўнгги жангида ғолиб чиққан ва ҳақли равишда ушбу вазнда тўртта камарга даъвогар сифатида эътироф этилганди.

IBF томонидан ҳамюртимиз учун тўртта камарни бирлаштирувчи жангига қадар яна битта қўшимча “сакраш тўсиғи”нинг қўйилиши ғайритабиий эканлигини таъкидлаган ҳолда айтиш лозимки, жаҳон профессионал боксидаги айрим карчалонлар ўзбек боксчисининг иккинчи енгил вазнда тўртта камарни бирлаштиришидан хавотирда эканлиги ойдинлашмоқда.

Ишонамизки, ўзбек "йўлбарслари”нинг муносиб вакили бу “тўсиқдан” қийинчиликсиз ўтади.

Боиси, унинг бўлғуси рақиби Тапалес бир пайтлари, яъни ўтган йилнинг 3 апрелида Тошкентдаги бокс кечасида Муроджонга "таслим бўлган” Рёсуке Ивасадан мағлубиятга учраган.

Филиппинлик Тапалес профессионал боксдаги фаолияти мобайнида 38 та жанг ўтказиб, 35 тасида ғалаба қозонган, 3 тасида мағлуб бўлган спортчи ҳисобланади.

Ҳамюртимиз эса профессионал боксдаги 10 та жангининг барчасида рингни ғолиб сифатида тарк этган. Шундан 7 та жангида рақибларини нокаутга учратган.

Тўлқин Рўзиев, ЎзА