Жорий йилнинг 2-13 декабрь кунлари Бирлашган Араб Амирликларининг Дубай шаҳрида эркаклар ўртасида IBA ташкилоти томонидан бокс бўйича жаҳон чемпионати ташкил этилади.

Ғолиблар 300 минг АҚШ доллари – кумуш медаль соҳиблари 150 минг, бронза медаль эгалари 75 минг, чорак финал иштирокчилари эса 10 минг АҚШ доллари пул мукофоти билан тақдирланади. Белгиланган ушбу мукофот пуллари қуйидагича тақсимланади: 
50 фоиз — боксчига, 
25 фоиз — мураббий ва қолган яна 
25 фоиз — миллий федерацияга.

Дарвоқе, мусобақа регламентига кўра, 3-11 декабрь кунлари жаҳон чемпионатининг саралаш, чорак ва ярим финал беллашувлари ташкил этилса, 13 декабрда финал жанглари бўлиб ўтади.

Қувонарлиси, мазкур дунё биринчилигида Тўлқин Қиличев қўл остидаги Ўзбекистон терма жамоаси қуйидаги 13 нафар чарм қўлқоп усталари билан иштирок этади: 

-48 кг. Шодиёржон Мелиқўзиев,
-51 кг. Ҳасанбой Дўсматов,
-54 кг. Асилбек Жалилов,
-57 кг. Хўжаназар Нортожиев
-60 кг. Абдумалик Халоков,
-63,5 кг. Саят Илясов,
-67 кг. Асадхўжа Мўйдинхўжаев,
-71 кг. Шавкатжон Болтаев,
-75 кг. Фазлиддин Эркинбоев,
-80 кг. Жавоҳир Умматалиев,
-86 кг. Акмалжон Исроилов,
-92 кг. Тўрабек Ҳабибуллаев,
+92 кг. Арман Маханов.

Жавоҳир Тошхўжаев, ЎзА