Товар-моддий бойликларни юртимизга турли яширин йўллар билан олиб киришга ва давлат бюджетига тушиши лозим бўлган божхона тўловларини тўламасликка бўлган уринишлар божхона ходимлари томонидан ўз вақтида бартараф этилмоқда.

Хусусан, Сирдарё вилояти божхона бошқармасининг Контрабандага қарши курашиш бўлими тезкор ходимлари “Сирдарё” чегара божхона пости билан ҳамкорликда ушбу пост орқали республика ҳудудига кириб келган “Volvo” русумли юк автотранспорт воситасида юк-кузатув ҳужжатларига асосан 41 турдаги автомобиллар учун эҳтиёт қисмлари борлиги кўрсатилган бўлса-да, божхона постидаги “Rapiscan” номли инспекцион-кўрик мажмуаси ёрдамида текширувдан ўтказилганда, товар билан юк-кузатув ҳужжатлари ўртасида тафовут аниқланиб, ўрнатилган тартибда мазкур автотранспорт воситаси божхона кўригидан ўтказилди.

Натижада юк кузатув ҳужжатларида кўрсатилмаган, дастлабки ҳисоб-китобларга кўра қиймати 610 млн. сўмлик 554 дона автомобиль эҳтиёт қисмлари борлиги аниқланди.

Ҳозирда ушбу ҳолат юзасидан божхона органлари томонидан суриштирув ҳаракатлари давом эттирилмоқда.

Шуҳрат Суяров, ЎзА