Сўнгги кунларда жаҳон ҳамжамияти ва юртдошларимизнинг диққат-эътибори Франция марказига қаратилди, десак муболаға бўлмайди. Президентимиз Шавкат Мирзиёевнинг ҳар икки мамлакат ўртасидаги ҳамкорликни янги босқичга олиб чиқишда муҳим аҳамиятга эга бўлган Францияга ташрифи том маънода ўзининг самарадорлиги билан ёдда қолади.

Эътироф этиш керак, икки мамлакат ўртасидаги алоқалар узоқ тарихга эга. Бу давлатлар ўртасидаги ҳамкорлик бугунги кунга келиб ўзининг янги тарихий даврини бошлади. Мамлакатимиз раҳбарининг навбатдаги ташрифи муҳим воқеликларга бой бўлди ва бу ҳар икки давлат ўртасида дўстлик ришталарини янада мустаҳкамлашда муҳим омил ҳисобланади.

Айниқса, Франция Президенти Эммануел Макрон томонидан Ўзбекистон етакчиси Шавкат Мирзиёевга Франциянинг энг олий давлат мукофоти – Фахрий легион ордени топширилиши нафақат Юртбошимиз, балки халқимизга бўлган юксак эҳтиром натижаси эканлигини таъкидлаш лозим.

Барчанинг диққат-эътиборини тортган яна бир жиҳат Президент Эммануел Макрон ўзбек тилида сўзлади. Қабул маросимида Франция Президенти: “Яшасин, Ўзбекистон! Яшасин, Франция! Яшасин, Франция-Ўзбекистон дўстлиги!”, деб фикр билдирди. Бу эса ўзбек миллатига ва ўзбек тилига чексиз ҳурмат белгиси бўлди.

Шунинг баробарида Франция раҳбари ўзининг ижтимоий тармоқдаги саҳифаларида ҳам ўзбек тилида ёзди. У ўзининг расмий саҳифасида “Францияга хуш келибсиз!”, дея Ўзбекистон Президентини олқишлаб хабар қолдирди ва “Яшасин Ўзбекистон, яшасин Франция!”, – дея уни якунлади. Бу эса икки давлат ўртасидаги муносабатларнинг нақадар самимий эканлигини кўрсатмоқда.

Ўзбекистон Франция билан 1992 йилдан бери дипломатик муносабатларни олиб бораётган бўлса-да, ушбу ташриф давомида ўз тарихида биринчи марта Франция билан стратегик шериклик муносабатларини ўрнатди. Шавкат Мирзиёев ва Эммануел Макроннинг ўзаро музокаралари якунида икки мамлакат ўртасида стратегик шериклик муносабатларини ўрнатиш тўғрисида тарихий қарорга келинди. Ундаги қўшма лойиҳалар портфели 12 миллиард евродан зиёдни ташкил этишини таъкидлаш лозим.

Ташриф давомида барча соҳаларда самарали ҳамкорлик олиб бориш белгиланди. Жумладан, келгусидаги олий таълим соҳасида ҳам янги келишувларга эришилгани малакали кадрлар тайёрлашда муҳим ўрин тутади. Айни пайтда жаҳон рейтингида олий таълим соҳасида Франция олийгоҳлари етакчи ўринларда туриши барчага маълум. Бу борада Ўзбекистонда Франциянинг илк университетини очилиши эса барча ёшларни ва зиёлиларни бирдек қувонтирди.

Ташриф самарадорлигини яна бир жиҳати, Франция пойтахти Париж шаҳри кўчаларидан бирига Самарқанд номи берилгани бўлди. Бу эса икки тарихий шаҳарлар ўртасидаги муштаракликни янада мустаҳкамлади.

Умуман олганда, Президент Шавкат Мирзиёевнинг Францияга ташрифи мамлакатимиз тарихида, унинг тараққиётида муҳим аҳамиятга бой воқелик бўлиш билан бирга халқларимиз ўртасидаги тарихий дўстлик алоқаларини янги босқичга олиб чиқишда муҳим қадам бўлди.

Наримон Деҳқонов,

Халқ депутатлари Наманган вилояти Кенгаши депутати,

сиёсий фанлар доктори, профессор.

ЎзА