Миллий ҳунармандчилигимизнинг қатор турлари асрлар, йиллар давомида авлоддан авлодга ўтиб, сайқал топиб келмоқда. Мустақиллик йилларида миллий ҳунармандчилигимизни янада ривожлантириш, ҳунармандлар фаолиятини қўллаб-қувватлаш, улар учун қулай шарт-шароитлар яратишга алоҳида эътибор қаратиб келинмоқда.

Бу борада Ўзбекистон Республикаси Президентининг 2023 йил 12 июнда қабул қилинган “Аҳолини ҳунармандчиликка жалб қилиш ва ҳунармандчилик фаолиятини ривожлантириш учун қулай шарт-шароитлар яратиш чора-тадбирлари тўғрисида” фармони алоҳида аҳамиятга эга ҳужжат бўлди.  

Мазкур фармондан кўзланган мақсад ҳунармандларни солиққа тортиш тизимини такомиллаштириш, уларни зарур хомашё ва молиявий ресурслар билан узлуксиз таъминлаш, ҳунармандчилик маҳсулотларини реализация қилиш учун инфратузилма яратиш ва бозорларни кенгайтириш ҳамда аҳолини ҳунармандчиликка кенг жалб этишдан иборат.

Шу мақсадда фармонда бир қатор вазифалар белгилаб берилган. Жумладан, ҳудудларда ҳунармандчилик фаолиятининг ҳар бир йўналишини алоҳида ёндашувлар асосида ривожлантириш дастурларини амалга ошириш, айниқса, ҳунармандчиликнинг йўқолиб кетаётган турларини сақлаб қолиш ва келгуси авлодларга етказиш кўзда тутилган. Бу борадаги ишлар «Ҳунарманд» уюшмасининг устувор вазифаси сифатида белгилаб берилди.

Шунингдек, календарь йил давомида ҳунармандчилик маҳсулотларини (ишлар, хизматлар) реализация қилишдан тушган тушумнинг 100 миллион сўмдан ошган, бироқ 1 миллиард сўмдан кўп бўлмаган миқдори бўйича айланмадан олинадиган солиқ ставкасини 50 фоизга камайтириш белгилаб берилди. Ҳунармандларнинг товар белгиларини миллий рўйхатдан ўтказиш бепул амалга оширилиши назарда тутилган.

Таъкидлаш лозимки, ҳунармандчилик ҳар қандай инсон шуғулланиши ва даромад топиши мумкин бўлган соҳадир. Айниқса, уйда ўтирган хотин-қизлар, эҳтиёжманд, ногиронлиги бор бўлган фуқаролар ҳам мустақил равишда ҳунармандчилик турлари билан машғул бўлиб, қўл меҳнати эвазига ҳалол даромад топиши, оиласига кўмак бериши мумкин. Юртимизда бундай ҳунарманд оилалар ва уйда ишлаётган ногиронлиги бўлган шахслар кўпчиликни ташкил этади.  

Эътиборлиси, мазкур фармонда касаначилик асосида уй шароитида ишлаётган ногиронлиги бўлган шахсларнинг иш жойини мослаштириш учун ҳар бир мослаштирилаётган иш жойи бўйича субсидия ажратиш тартиби ҳунармандчилик билан шуғулланаётган ногиронлиги бўлган шахсларга нисбатан ҳам татбиқ этилиши белгилаб берилди.  

Бундан ташқари, турли ҳунармандчилик йўналишлари бўйича кўзгазмалар ва фестивалларни ташкил этиш масалалари кўзда тутилган.  

Бир сўз билан айтганда, ушбу фармон юртимизда ҳунармандчиликни янада ривожлантириш ва соҳа вакилларини қўллаб-қувватлашда муҳим ўрин тутади. Айниқса, ҳунармандчиликнинг йўқолиб кетаётган турларини сақлаб қолиш ва келгуси авлодларга етказишда ҳужжатда кўзда тутилган чора-тадбирларнинг аҳамияти каттадир.    

Муҳтарама Комилова, ЎзА