Португалияда эркаклар ўртасида теннис бўйича М25 таснифига кирувчи халқаро турнирда мамлакатимизнинг биринчи рақамли теннисчиси Ҳумоюн Султонов жуфтлик ва яккалик баҳсларида иштирок этмоқда.

Мусобақанинг жуфтлик баҳсларида Ҳумоюн Султонов германиялик шериги Лукас Далиано билан биргаликда литвалик Юлий Аугунас ва португалиялик Жоао Португал тандемини 6:3, 6:4 ҳисобида таслим қилди. Шу тариқа чорак финалга йўл олган Ҳумоюн ва Лукас энди ярим финал йўлланмаси учун мезбон теннисчилар Тиаго Бошманс ҳамда Даниэл Маринкас жуфтлиги билан рақобатлашади.  

Шунингдек, Ҳ.Султонов яккалик баҳсларининг илк даврасида италиялик Фабризио Андалорога қарши кортга тушади. Шуни таъкидлаб ўтишимиз лозимки, теннисчимиз ўтган ҳафтада айнан Португалияда ўтказилган нуфузли турнирнинг яккалик баҳсларида бош совринни қўлга киритган эди.  

Жавоҳир Тошхўжаев, ЎзА