Сирдарё вилоятининг Янгиер шаҳрида туғилган Фарудун Тўраев ҳозир 29 ёшда. Самарқанд давлат тиббиёт институтини тамомлаган. 2019-2021 йилларда Россиянинг Бакулев номидаги юрак-қон томир касалликлари жарроҳлик марказида кардиоанестезиология ва реанимация йўналишида ординатурада ўқиган. Шундан сўнг мазкур марказда ишлаб тажриба орттирган.
Қаҳрамонимизнинг таъкидлашича, Россиядаги фаолияти давомида юрак-қон томир тизимидаги деярли барча операцияларда иштирок этган. Қолаверса, кардиоҳирургик амалиётларда анестезия, яъни наркоз беришнинг ўзига хос усуллари, операциядан кейин беморларни реанимацияда даволаш, сунъий юрак аппарати билан ишлашни ўрганган.
Ана шу даврда Республика ихтисослаштирилган кардиология илмий-амалий тиббиёт маркази Жиззах филиалида янги очилган Кардиохирургия бўлимида ишлаш таклифи тушди. Бу соҳани танлашидан, хорижда билим оширишдан асл мақсади халқимиз саломатлигига кўпроқ ҳисса қўшиш эди. Шунинг учун у ҳеч иккиланмай, Ватанга қайтди.
Айни пайтда Республика ихтисослаштирилган кардиология илмий-амалий тиббиёт маркази Жиззах филиалида фаолият юритмоқда. Ўтган 6 ойдан зиёд вақт ичида тўқсондан ортиқ операцияда иштирок этди.
ЎзА