Muhtaram Prezidentimiz yaqinda bo‘lib o‘tgan videoselektor yig‘ilishida klinik ordinaturada o‘qitishning yangi tizimini joriy etib, kelgusi o‘quv yildan qabul kvotasini ikki baravarga oshirish bo‘yicha bergan topshiriqlari bejiz emas, albatta.
Endilikda taklif etilayotgan yangi tizim bo‘yicha o‘quv jarayonining ma’lum qismini oliygohlar va ixtisoslashgan markazlarda, ma’lum qismini esa ish joyida davom ettirilishi bo‘yicha zarur huquqiy asoslar yaratiladi.
Darhaqiqat, umumiy amaliyot vrachi bo‘lmasdan turib, tibbiyot sohasining yaxshi mutaxassisi bo‘lish mushkul. Buning uchun avvalo o‘qib o‘rganish, tajriba orttirish shuningdek, hayotimizning turli sohalaridagi muammo va kamchiliklar, yo‘limizda katta g‘ov bo‘lib turgan to‘siqlarni bartaraf etish maqsadida birlashib, kengashib ish ko‘rmoq kerak.
Muhtaram Prezidentimiz ta’kidlaganidek, ishning katta kichiligiga qarab emas, muhimlik darajasini inobatga olib, vijdon amri bilan bajarish har birimizning qalb xitobimizga aylanmog‘i lozim.
Endi bir mulohaza qilib ko‘raylik. Tibbiyotning quyi tizimida shu kungacha mavjud bo‘lgan ish uslubi, qay darajada o‘zini oqlay oldi. Kun sayin aholi salomatligi himoyasi yo‘lida bajarilishi lozim bo‘lgan ishlar, xususan tibbiyot tizimidagi tor mutaxassisliklarga bo‘lgan talab va ehtiyoj qanchalik dolzarblik kasb etmoqda.
Tan olish kerak hozirgi kunga qadar respublikamizda tor mutaxassislar magistratura va klinik ordinatura orqali tayyorlanib kelinmoqda. Sababi Respublikamizda tor mutaxassislarga bo‘lgan ehtiyojni ta’minlash asosan klinik ordingatura orqali amalga oshiriladi. Statistik ma’lumotlarga ko‘ra, ayni kunda hududlarda 10 ming nafar tor doiradagi mutaxassislar yetishmaydi. Bu esa mazkur soha faoliyatida tub burilish payti bo‘lganligiga ishoradir.
Bo‘lib o‘tgan videselektor yig‘ilishida masalaga jiddiy yondashib, muammoning dolzarbligidan kelib chiqqan holda ishga yangicha munosabat davri kelganligi aytildi.
Haqiqatdan ham hozirgi kunda nafaqat respublikamiz poytaxti Toshkent shahridagi tibbiyot oliy o‘quv yurtlari va ixtisolslashgan markazlarda, balki butun viloyat va tumanlarda ham tibbiyot sohasida moddiy texnik bazalar tubdan o‘zgartirilmoqda. Ayni kunda deyarli barcha hududlarga yangi, zamonaviy tibbiy texnikalar kirib keldi. Klinik ordinatorlarning xududlarda o‘qish va amaliyot jarayonlarini olib borishlari uchun maxsus laboratoriyalar faoliyati ham yo‘lga qo‘yilgan. Shuning uchun bu yo‘nalishda tahsil olayotgan klinik ordinatorlar o‘z mutaxassisliklari bo‘yicha amaliyotlarini xududlarda o‘tab kelmoqdalar.
Barcha tibbiy oliy o‘quv yurtlari va ixtisoslashgan markazlarda klinik ordinatorlar tayyorlash umumiy kvota asosida amalga oshirilmoqda. Shuningdek, viloyatlarda mutaxassislarga bo‘lgan ehtiyojidan kelib maqsadli kvota o‘rinlari ajratilmoqda.
Bu borada Toshkent tibbiyot akademiyasi yetakchi oliy o‘quv yurtlaridan biri hisoblanib, 43 ta mutaxassislik yo‘nalishlari bo‘yicha yiliga 220-250 nafar klinik ordinatorlarni tayyorlab beradi.
Akademiyaga berilgan grant asosidagi o‘rinlarning deyarli barchasi viloyatlardagi ehtiyojdan kelib chiqqan holda maqsadli o‘rinlar uchun ajratilgan. Maqsadli o‘rinlar uchun qabul qilingan shifokorlar o‘zaro shartnoma tuzib, o‘qish tugagandan keyin 3 yil mobaynida o‘sha xududda ishlab kelganidan keyingina diplom berilmoqda.
Shundan ham ko‘rinib turibdiki, viloyatlarda tor mutaxassislarga bo‘lgan talab va ehtiyojdan kelib chiqqan holda ko‘proq maqsadli grant o‘rinlarining ajratilishi bugungi kunning muhim vazifalaridan biridir. Maqsad, ordinatura kvotasini ikki marotaba oshirish evaziga aholiga yaqin va qulay bo‘lgan tibbiyot xizmatining zamonaviy va hammaboplik kasb etadigan yangi sifat darajasiga erishish.
Bu maqsadlarimizga bir yoqadan bosh chiqarib, bir-birimizni qo‘llab-quvvatlab, vijdon amri va vatanga sadoqat ruhidagi halol mehnatimiz bilan yetishimiz mumkin.
GULCHEHRA MIRZAEVA,
Toshkent tibbiyot akademiyasi matbuot kotibi