Халқ депутатлари Бухоро вилояти Кенгашининг навбатдаги сессиясида вилоят ҳокимининг ўринбосарлари, тегишли вилоят бошқармалари, ташкилотлари ва муассасалари раҳбарлари, сиёсий партиялар, жамоат ташкилотлари, оммавий ахборот воситалари вакиллари ҳамда туманлар ва шаҳарлар студияларидан секторлар раҳбарлари, тегишли ҳоким ўринбосарлари, тиббиёт бирлашмалари бошлиқлари қатнашди.
Сессияни Халқ депутатлари вилоят Кенгаши раиси, вилоят ҳокими Ботир Зарипов бошқарди. Депутатлар ҳудудларни ижтимоий-иқтисодий ривожлантириш, ижтимоий ва ишлаб чиқариш инфратузилмаси дастурининг ижросини таъминлаш ҳамда “Темир дафтар”, “Аёллар дафтари” ва “Ёшлар дафтари” асосида амалга оширилаётган ишлар юзасидан вилоят прокурори, 2-сектор раҳбари Маҳмуд Истамовнинг ҳисоботини эшитди.
Таъкидланишича, сўнгги йилларда мамлакатимизда аҳоли, шу жумладан, хотин-қизлар ва ёшларнинг ижтимоий ҳимояга муҳтож, ишсиз ва касб-ҳунарга эга бўлмаган, ҳуқуқий ва маънавий-психологик қўллаб-қувватлаш зарурати бўлган фуқароларга давлат томонидан манзилли тарзда кўмаклашиш бўйича мутлақо янгича тизим жорий қилинди. Ушбу йўналишда манзилли, ҳар бир шахс билан индивидуал ва тизимли равишда мунтазам иш олиб боришни ташкил қилиш мақсадида моддий ёрдам ва кўмакка муҳтож оилалар бўйича мутлақо янги – “Темир дафтар”, ижтимоий-иқтисодий қўллаб-қувватлашга, касб-ҳунар ўрганишга эҳтиёжи ва иштиёқи бўлган хотин-қизлар ва ёшлар бўйича тегишлича “Аёллар дафтари” ва “Ёшлар дафтари” тизимлари ҳаётга татбиқ этилди. Бу борада вилоят прокуратураси томонидан жорий йилнинг ўтган даврида барча 2-сектор ҳудудларида “маҳаллабай” тизими асосида ишлар ташкил қилиниб, бир қатор тадбирлар амалга оширилган.
Жумладан, жорий йилнинг ўтган даврида прокурорлар секторларидаги 451 та эҳтиёжманд оилага 174 миллион сўмлик озиқ -овқат, 16 миллион сўмлик дори-дармон, 109 миллион сўмлик чорва ва 85 миллион сўм пул маблағлари моддий ёрдам сифатида тарқатилган. Шунингдек, 32 та оиланинг коммунал соҳада табиий газ, электр энергия, шунингдек ичимлик сувдан бўлган 14 миллион сўмлик қарздорлиги тўлаб берилган. “Темир дафтар” да рўйхатга олинган 451 та оиланинг жами 187 нафар меҳнатга лаёқатли ишсиз аъзолари иқтисодиёт, инвестиция, қишлоқ хўжалиги, қурилиш комплексларига доимий ишга жойлаштирилган.
Кўрсатилган амалий ёрдамлар натижасида прокурорлар секторларидаги 280 та эҳтиёжманд оила маҳаллий Кенгашларнинг қарорлари асосида “Темир дафтар”дан чиқарилган. Ўтган давр мобайнида уйма-уй юриш асосида аниқланган 8 минг 391 та тиббий ёрдам, табиий газ ва электр энергияси таъминоти, бандлик ҳамда моддий ёрдам ажратиш билан боғлиқ муаммолар ҳал этилган. Секторлар томонидан 1 минг 114 та ижтимоий ва бошқа объектларда ўтказилган ўрганишларда аниқланган 539 та муаммоли масаланинг қонуний ечимига амалий ёрдам кўрсатилган. Прокурорлар секторларида 2022 йилнинг ўтган даврида ҳал этилиши лозим бўлган жойлардаги 137 та, вилоят миқёсидаги 75 та ва республика даражасидаги 54 та муаммолар аниқланиб, жорий йилнинг 2-чораги учун мўлжалланган “йўл харитаси” ижрога қаратилган.
Ёшлар бандлигини таъминлаш, уларнинг муаммоларини ҳал этиш мақсадида 2-секторда “Ёшлар дафтари”га киритилган жами 1 минг 564 нафар ёшларнинг 1 минг 189 нафари рўйхатдан чиқарилган. Қолган 375 нафарига ёрдам кўрсатилмоқда. Жамғармалар ҳисобидан бугунги кунга қадар “Ёшлар дафтари”даги 847 нафар ёшларга 3 миллиард 456 миллион сўм миқдордаги кўмак кўрсатилган. Жойларда ташкил этилган “маҳаллабай” тизими асосида секторларда яшовчи ёшлар билан 223 маротаба учрашувлар уюштирилган. Улар билан бевосита суҳбатлар ўтказилган. Тадбирлар давомида ёшлар келажагимиз ва оилавий тадбиркорликни ривожлантириш дастури доирасида 152 нафар ёшларга тадбиркорлик ва ҳунармандчилик фаолиятини олиб бориш ва ривожлантириш учун 3,4 миллиард сўм имтиёзли кредит маблағлари ажратилган.
Ўтказилган тадбирлар натижасида бугунги кунда 2-секторда жами 1 минг 189 нафар ёшларнинг муаммолари ҳал этилган. Шунингдек, “Аёллар дафтари” бўйича уйма-уй хатлов амалга оширилиб, 6 тоифага кирувчи 9 минг 306 нафар хотин-қизлар “Аёллар дафтари” га киритилган ва манзилли тадбирлар белгилаб олинган. Бу борада йўл хариталари тасдиқлангандан сўнг “Аёллар дафтари”га киритилган хотин-қизларга амалий ёрдам кўрсатиш ишлари бошланган. Шу кунга қадар дафтарга киритилган 9 минг 306 нафар хотин-қизларнинг 3 минг 958 нафарига амалий ёрдам кўрсатилган.
Иш билан таъминланиши белгиланган 4 минг 158 нафар аёллардан 1 минг 678 нафари иш билан таъминланган. “Аёллар дафтари”га кирган тадбиркорлик қилиш истагида бўлган 830 нафар аёллардан 276 нафарига имтиёзли кредит ажратилган. Дафтарга кирган 2 минг 34 нафар боқувчисини йўқотган эҳтиёжманд хотин-қизларнинг 926 нафарига бир марталик моддий ёрдам кўрсатилган. Уй-жойга муҳтож 136 нафар эҳтиёжманд хотин-қизларнинг 3 таси уй-жой билан таъминланган. Вилоят прокурори сектори штабида ташкил этилган хотин-қизлар ҳуқуқий-психологик маслаҳатхонасида жами 215 нафар хотин-қизлар қабул қилиниб, шундан ажрим ёқасига келиб қолган 87 нафар оила яраштирилишига эришилган.
Вилоят 2-сектор ҳудудида ижтимоий инфратузилмани яхшилаш борасида бир қатор манзилли тадбирлар амалга оширилмоқда. Хусусан, прокурор секторлар томонидан 1 минг 114 та ижтимоий ва бошқа объектларда ўтказилган ўрганишларда аниқланган 539 та муаммоли масаланинг қонуний ечимига амалий ёрдам кўрсатилган.
Зариф Комилов,
ЎзА мухбири