"Париж-2024" Олимпиадасининг йўлланмалари ва рейтинг очколарини қўлга киритишда жорий йилнинг сўнгги ойларида ўтказилаётган Олимпия саралаш мусобақалари муҳим аҳамият касб этади.

Бугунгача мамлакатимиз спортчилари келгуси йили Парижда бўладиган ёзги Олимпия ўйинларининг 12 та йўлланмасини қўлга киритган бўлса, бир қатор спорт турларида ҳамюртларимиз рейтинг очколарига эга бўлиб турибди.  

Ҳозиргача боксчиларимиз 4 та, эркин ва юнон рум курашчиларимиз 3 та, велоспортчиларимиз 4 та, бадиий гимнастикачиларимиз 1 та Олимпия йўлланмаларига эга бўлиб турибди.  

Шунингдек, таэквондо, оғир атлетика, дзюдо, қиличбозлик каби қатор спорт турларидаги терма жамоамиз аъзолари "Париж-2024" рейтинг очколарини жамғаришда пешқадамлик қилишмоқда.  

Бундан ташқари футбол бўйича эркаклар ва аёллар терма жамоаси аъзолари тўрт йиллик ўйинларда иштирок этиш йўлида муносиб натижаларга эришишга ҳаракат қилаётгани эътиборли.  

Айни кунларда камондан отиш бўйича Ўзбекистон терма жамоаси вакиллари Таиландда ташкил этиладиган кетма-кет иккита лицензион мусобақаларда иштирок этиш учун йўл олди.  

Мерганларга "Париж-2024" чипталарини тақдим этадиган биринчи мусобақа — Осиё чемпионати 5-9 ноябрь кунлари ташкил этилади.  Чемпионат низомига кўра, шу пайтгача йўлланма ололмаган атлетлар орасида энг яхши натижа кўрсатган икки мерган Олимпиада иштирокчисига айланиши мумкин бўлади.  

Шундан сўнг, 10-12 ноябрь кунлари Таиландда иккинчи лицензион турнир бўлиб ўтади. Мазкур мусобақа фақат жамоавий дастурда ўтказилиб, унда эркаклар ва аёллар ўртасида биринчи ўринни қўлга киритган давлатларгина "Париж-2024" йўлланмаси соҳибига айланади.  

Ушбу нуфузли мусобақаларда "Париж-2024" йўлланмалари учун Ўзбекистон терма жамоаси аъзоларидан Амирхон Содиқов, Озодбек Унгалов, Чен Яо Юй, Миржалол Миролимов, Зиёдахон Абдусатторова, Нилуфар Ҳамроева, Жасмина Нурманова ва Бибихожар Йўлдошева кураш олиб боради.  

Т.Рўзиев, ЎзА