Хотира ва қадрлаш – инсон ақл-заковатининг бетакрор маънавий неъматлари, тирикликнинг азалий мезонлари ҳисобланади. Аждодлар хотирасини ёд этиб, эзгу ишларини давом эттириш, бугун сафимизда юрган, эл-юрт тинчлиги ва равнақи йўлида хизмат қилган кексаларни эъзозлаш маънавий ҳаётимизнинг ажралмас қисмига айланди.

Aлишер Навоий номидаги Тошкент давлат ўзбек тили ва адабиёти университетининг 1чи босқич талабалари Қатағон қурбонлари хотираси музейига ташриф буюришди. Ташрифда университет маъмурияти вакиллари, проректорлар, кафедра мудирлари ҳамда турли курслардан талаба-ёшлар иштирок этишди.  

Экскурсия давомида музей ходимлари томонидан иштирокчиларга экспозицияларнинг мазмун-моҳияти ҳақида батафсил маълумот берилди. Талабаларга қатағон даврига оид архив ҳужжатлар, фотосуратлар, шахсий буюмлар ва гувоҳларнинг хотиралари намойиш қилиниб, ўтган асрнинг мураккаб жараёнлари, жадид зиёлиларининг ҳаёти ва фаолияти ҳамда уларнинг маънавий-маърифий мероси ҳақида тушунтиришлар берилди.

Талабалар ташрифдан катта таассурот олиб, аждодларимизнинг истиқлол йўлидаги курашлари ва кўрган машаққатлари ҳақида янада кенгроқ тушунча ҳосил қилдилар. Ташриф сўнгида музей раҳбариятига миннатдорчилик изҳор этилиб, келгусида таълимий дастурлар, маънавий-маърифий тадбирлар ва қўшма кўргазмалар ташкил этиш бўйича келишувларга эришилди.

<iframe width="640" height="420" src="https://www.youtube.com/embed/jVYDoQuYkNo" title="Xotira bor ekan – millat barhayot" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳайё Турдалиева, Улуғбек Тўхтаев (видео), ЎзА