Куни кеча қабул қилинган “Хотин-қизларнинг пиллачилик соҳасидаги бандлигини босқичма-босқич таъминлаш чора-тадбирлари тўғрисида”ги Ҳукумат қарори билан хотин-қизларни пиллачилик соҳасида қисқа муддатли ўқув курсларида ўқитиш ва уларни соҳага жалб қилишнинг асосий параметрлари ҳамда уни босқичма-босқич таъминлаш тизимини ташкил этиш бўйича “йўл харитаси” тасдиқланди.

Асосий параметрларга мувофиқ қисқа муддатли ўқув курсларини тамомлаган хотин-қизларнинг бандлиги 2024 йил 3 майдаги Президентнинг тегишли фармонига мувофиқ устувор равишда пиллачилик кластерлари, ипак қурти уруғчилиги корхоналари, пиллачилик ва тутчилик йўналишидаги фермер хўжаликларига мавсумий ҳамда доимий ишларга қабул қилиш орқали таъминланади.

Бир ой муддатда Хитой, Вьетнам, Ҳиндистон ва Япония давлатларининг ипакчилик соҳасидаги мутахассислари иштирокида хотин қизлар учун қисқа муддатли ўқув курслари ташкил этилади.

Пиллачилик соҳасида банд бўлган фуқароларнинг маълумотлари “yangiish.mehnat.uz” платформасига киритиб борилиши таъминланади.

Асосий параметрларга мувофиқ пиллачилик соҳасида қисқа муддатли ўқув курсларини тамомлаган хотин-қизларнинг доимий ва мавсумий ишларга қабул қилинганлиги ҳисоби юритилади.

ЎзА