Халқаро маълумотларга кўра, дунё бўйича ҳар учинчи аёл ҳаёти давомида камида бир марта турли шаклдаги зўравонликка дуч келади. Мутахассислар бундай ҳолатларнинг олдини олишда ҳуқуқий ҳимоя механизмларини кучайтириш, жамиятда ҳуқуқий маданиятни ошириш ҳамда эрта профилактика ва маърифий ишларни тизимли ташкил этиш муҳим аҳамият касб этишини таъкидлайди.

Ўзбекистонда ҳам хотин-қизларга нисбатан зўравонликка қарши курашиш давлат сиёсати даражасига кўтарилган. Хусусан, сўнгги йилларда қабул қилинган қонун ҳужжатлари асосида зўравонликка учраган шахсларни ҳимоя қилиш, уларга ҳуқуқий, психологик ва ижтимоий ёрдам кўрсатиш тизими йўлга қўйилган. Республиканинг барча ҳудудларида махсус ишонч телефонлари ва реабилитация марказлари фаолият юритиб, жабрланган аёлларга бепул маслаҳат ва амалий ёрдам кўрсатилмоқда. Бу эса жамиятда зўравонликка нисбатан муросасиз муносабатни шакллантиришда муҳим қадам ҳисобланади.

Ана шу долзарб вазифалардан келиб чиққан ҳолда, Мирзо Улуғбек номидаги Ўзбекистон Миллий университетида хотин-қизларга нисбатан зўравонликнинг олдини олиш, уларнинг ҳуқуқ ва қонуний манфаатларини ҳимоя қилиш ҳамда жамиятда зўравонликка нисбатан муросасиз муносабатни шакллантириш мақсадида тадбир ташкил этилди.

Тадбир давомида масъул мутасаддилар томонидан хотин-қизларга нисбатан зўравонликнинг жисмоний, руҳий, иқтисодий ва психологик каби турлари, унинг келиб чиқиш сабаблари ҳамда салбий оқибатлари ҳақида батафсил маълумот берилди. Таъкидланганидек, бундай ҳолатлар нафақат шахс саломатлигига, балки оила барқарорлиги ва жамият тараққиётига ҳам  салбий таъсир кўрсатади.

Шу билан бирга, зўравонлик ҳолатларининг олдини олиш, жабрланган шахсларга ҳуқуқий, психологик ва ижтимоий ёрдам кўрсатиш механизмлари юзасидан ҳам атрофлича тушунтириш ишлари олиб борилди. Иштирокчилар ўзларини қизиқтирган саволлар билан мурожаат қилиб, мутахассислардан батафсил жавоблар олди.

Тадбир якунида зўравонликка қарши курашишда таълим муассасаларининг ўрни алоҳида аҳамиятга эга экани қайд этилди. Хусусан, ёшлар орасида соғлом муносабатлар маданиятини шакллантириш, ҳуқуқий билимларни ошириш ва тенглик тамойилларини тарғиб этиш орқали келгусида бундай салбий ҳолатларни камайтириш мумкинлиги таъкидланди.

Нигора Раҳмонова, ЎзА