Фарғона вилояти экин майдонлари бирдек хусусиятга эга эмас. Унинг бир қисми чўлда жойлашган бўлиб, қумлоқ. Яна бир ҳудудда ер ости сувлари юзага яқин, захкаш. Бир тоифаси шўрланган. Масалан, Данғара туманида 5450 гектар 2026 йилда чигит экиладиган пахта майдонининг 3700 гектари шўрланган. Уларда, жумладан. “Инобатхон зиёси” фермер хўжалигида шўр ювиш жадал давом этяпти.

– Бу ерларимиз ўта шўр ерлар, – дейди фермер хўжалиги раҳбари Ҳамдамжон Азимов. –Кўчатларимиз яхши чиқиши учун иложи борича ерни 3 мартагача ювамиз. Бу иккинчиси. Керакли миқдордаги кўчат олиш учун яна бир марта шўр ювиш керак.

Маълумки, сув йилдан-йилга танқис бўлиб боряпти. Энди деҳқон бу борада ҳам ўз режаларини кўрмоқда. Ҳамдамжон Азимовнинг айтишича, фермер хўжалиги ҳудудидаги ўқ ариқлар асосан бетон қилиниб бўлган. Сувни бошқаришда исрофгарчиликка йўл қўйилмаслик учун шлюз, дамба тўсқичлар ҳам ўрнатилган.

– Биринчи навбатда ариқларни бетонладик. Бу сувни тежашда ва шўр ювишда ёрдам беради. Ёз кунларида томчилатиб суғорамиз, – дейди илғор фермер.

Данғарада меҳнат интизоми, агротехник қоидаларга риоя этиш юксак даражада. Шунинг учун ҳам 2025 йилда қишлоқ хўжалигининг барча соҳаларида юқори натижаларга эришилди.

– 100 фоиз фермерларимиз шўрларни ювиб бўлишди. Бу фермеримиз эса иккинчи ювишни бошлаган, – дейди Данғара тумани мелиорация бўлими бошлиғи Сирожиддин Нуриддинов “Инбатхон зиёси” фермер хўжалиги ерларини кўрсатар экан. –Сувни фермерларга тақсимот бўйича етказиб беряпмиз. Белгиланган муддатда шўр ювиш ишларини якунлаймиз.  

Фермер Ҳамдамжон Азимов ҳосилдорлик қилинаётган меҳнатга яраша бўлиши лозим, дейди.  

– Ўтган йили буғдой эккандик. 75 центнердан олганмиз. Бу йил пахтани 50 центнерга етказиш ниятимиз бор.

<iframe width="640" height="420" src="https://www.youtube.com/embed/OM4A6Dqp_BA" title="Hosildorlik sho‘r yuvishga ham bog‘liq" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов (видео, сурат), ЎзА