Яқин Шарқда юзага келган ҳарбий кескинлик ортидан дунёнинг энг муҳим стратегик денгиз йўлларидан бири — Ҳормуз бўғозида нефть ташувчи танкерлар ҳаракати деярли тўхтаб қолди.

Бу ҳақда Эроннинг "Fars" ахборот агентлиги маълум қилган. Халқаро кузатув тизимлари қайд этишича, ҳудудда кемалар ҳаракати тезлиги кескин пасайиб, айрим нуқталарда батамом тўхтаган. 

Оммавий ахборот воситалари Европанинг айрим давлатлари ўз байроғи остида сузаётган танкерларни хавфсизлик нуқтаи назаридан мазкур йўналишдан вақтинча фойдаланмасликка чақирганини ёзмоқда. 

Маълумки, Ҳормуз бўғози орқали жаҳон нефть экспортининг салмоқли қисми ташилади. Ушбу йўлакдаги ҳар қандай узилиш халқаро энергия бозорида нарх кескин ўзгаришига сабаб бўлиши мумкин. Таҳлилчилар фикрича, агар шундай вазият узоқ муддат сақланиб қолса, бу нафақат нефть нархи, балки глобал логистика тизими ва энергия таъминоти занжирига ҳам жиддий таъсир кўрсатади. Натижада кўплаб давлатлар учун иқтисодий хавф-хатар ортиши эҳтимолдан холи эмас. 

Ф. Яхшибоева, ЎзА