Президентимиз ташаббуси билан мамлакатимизда хорижлик инвесторларга яратилаётган қулай ишбилармонлик муҳити ер ости ва ер усти нодир бойликларига сероб Сурхондарё вилоятига ҳам чет эллик сармоядорлар қизиқишини оширмоқда. Ўз бизнесини йўлга қўйиш истагида воҳага келиб, таклиф ва ғояларини ўртага ташлаётган хорижлик сармоядорлар сафи кенгайиб бормоқда.

Вилоят ҳокими Улуғбек Қосимовнинг бир йўла Франция, Ҳиндистон, Афғонистон, Покистон ва Хитой давлатларидан келган сармоядорлар делегациялари билан учрашуви ҳам хорижлик инвесторларда воҳадаги лойиҳаларга катта қизиқиш борлиги кўзга ташланди. 

Самимий руҳда ўтган ўзаро мулоқотда Франциянинг “Stone City Energy”, Ҳиндистоннинг “Glocal Euroasia”, Афғонистоннинг "Afghan German Company", Покистоннинг “NajeeB Fibers” LLC ҳамда Хитойнинг “Teca Technology Wuhan Company Limited”, “Henan Dazhou Machinery Equipment Co., Ltd”, “Bedley Hong Kong International Limited”, “Horgos Hongheyuan International Trade Co., Ltd” компаниялари вакиллари билан ҳамкорликдаги лойиҳалар муҳокама этилди.

Музокараларда инвесторларнинг буғ-газ электр станцияси қурилиши, мис қазиб олиш ва қайта ишлаш кластери ташкил этиш, кўп қаватли турар жой мажмуаларини қуриш, ип-калава, мато, тайёр кийим-кечак маҳсулотлари ишлаб чиқариш, мис ҳамда кўмир қазиб олиш ва қайта ишлаш лойиҳалари кўриб чиқилди.

Учрашув якунида хорижнинг етакчи ушбу компаниялари билан ҳамкорликни кенгайтириб, қўшма инвестицион лойиҳаларни амалга ошириш юзасидан келгусидаги режалар белгилаб олинди.

Холмўмин Маматрайимов,

ЎзА мухбири