Пойтахтимизда ўтказилган “Офтальмологияда инновацион технологиялар ITO-2025” II халқаро илмий-амалий конференцияси иштирокчиларининг бир гуруҳи Самарқандда бўлди.

Дастлаб меҳмонлар Амир Темур мақбарасига ташриф буюриб, уларга темурийлар даврда илм-фанга қаратилган эътибор ҳақидаги қизиқарли маълумотларга тақдим этилди.

– Тарихга қизиқишим боис, қаерга борсам, у ернинг тарихий шаҳарлари билан батафсил танишишга уринаман, – дейди конференция иштирокчиси, британиялик Ирина Сандерс.– Аммо, Самарқанд ҳақида кўп эшитганим боис, бу кўҳна шаҳарга кўпдан бери келишни орзу қилардим. Ҳаётим давомидаги орзуларимдан яна бири ушалганидан мамнунман. Конференция самарали ўтди. Бугун Самарқанд саёҳати ҳам кутганимиздан мароқли ўтмоқда. Гид-таржимон сўзлаб берган маълумотларни эшитиб, тарихий обидаларда юрган вақтим ўзимни ўша даврга тушиб қолгандек ҳис этаяпман.  

[gallery-23409]

Меҳмонлар Регистон ансамбли, Амир Темур масжиди, Шоҳи Зинда мажмуаси, “Сиёб деҳқон бозори”да бўлиб, халқимиз тарихи, маданияти билан танишиб, миллий ҳунармандчилик маҳсулотларини кўздан кечиришди.

– Конференцияда қатнашиб, касбий фаолиятим учун кўплаб янгиликларни ўрганган бўлсам, Самарқандга саёҳат қилиб, тарих зарварақларига муҳрланган манбалардан баҳра олдим, – дейди қозоғистонлик врач-офтальмолог Ақэрка Макон қизи. – Гўзал табиати, бетакрор тарихий обидалар кишини ўтмишга етаклайди. Ҳунармандларнинг бежирим санъат намуналари ҳам сайёҳларни ўзига жалб этади. Умуман, Самарқандга келган сайёҳ афсусланмайди.

Ғ. Ҳасанов, А. Исроилов (сурат), ЎзА мухбирлари