Эртага Тошкент давлат транспорт университетида миллий спортимиз кураш бўйича хорижлик кураш мутахассислари учун уч ойлик ўқув курсининг якуний босқичи бошланади.

Бугун, 23 октябрь куни мазкур курс машғулотларида иштирок этиш учун бир қатор давлатларда фаолият юритаётган кураш мутахассислари юртимизга етиб келди.

Уларни Ислом Каримов номидаги Тошкент халқаро аэропортида Халқаро кураш институти мутахассислари кутиб олишди.

29 октябрга қадар давом этадиган машғулотлар иштирокчилар учун ўз билим ва кўникмаларини амалда намойиш этиш, янги тажриба орттириш ҳамда кураш тўғрисидаги билимларини бойитиш сари қўйилган муҳим қадам бўлади.

Курс якунлари бўйича тингловчилар имтиҳон топширган ҳолда мутахассислик сертификатларига эга бўлишади.

Эътиборли жиҳати, айнан мазкур машғулотлар орқали дунё мамлакатларида кураш спортининг малакали мутахассислари сони ортади. Бу, миллий спортимиз курашнинг халқаро майдонда оммалашишига хизмат қилади.

Т.Рўзиев, ЎзА