Бухоро вилоятининг “Олот” чегара божхона пости орқали белгиланган меъёрдан ортиқча бўлган нақд хорижий валютани олиб чиқиб кетишга бўлган уринган шахс тўхтатиб қолинди.

Вазирлар Маҳкамасининг 2018 йил 30 январдаги “Жисмоний шахслар томонидан Ўзбекистон Республикаси нақд валютаси ва нақд чет эл валютасини Ўзбекистон Республикасининг божхона чегараси орқали олиб кириш ва олиб чиқиб кетиш қоидаларини тасдиқлаш ҳақида”ги қарори талаблари асосида божхона органи ходимлари томонидан белгиланган меъёридан ортиқча бўлган нақд валюта маблағларининг юртимиз ҳудудидан олиб чиқиб кетилиши устидан бевосита назорат амалга оширилади.  

“Олот” чегара божхона пости орқали хорижий давлатга чиқиб кетиш ниятида бўлган фуқаро божхона назорати зонасидан ҳаракатланиш чоғида божхона ходимининг оғзаки сўровида маълум қилмаган ҳолда белгиланган меъёрдан ортиқча бўлган 11 465 АҚШ долларини олиб чиқиб кетишга уринган чоғида тўхтатиб қолинди.  

Маълумот учун: тегишли қонунчилик талабларига биноан жисмоний шахслар томонидан эквиваленти 100 миллион сўмдан ортиқ бўлган нақд валюта маблағлари Ўзбекистон Республикасидан ташқарига божхона назорати қоидаларига риоя этилган ҳолда божхона юк декларациясида қайд этилиб, олиб чиқиб кетишга рухсат этилади.  

Зариф Комилов, ЎзА мухбири