Мажбурий ижро бюроси Наманган вилояти Давлатобод туман бўлими томонидан турк компаниясига салкам 52 минг АҚШ доллари миқдоридаги қарздорлик ундириб берилди.

Аниқланишича, вилоят иқтисодий судининг ижро варақасига асосан қарздор жамиятдан ундирувчи “LGM DIS TIGARAT PARAZLAMA LTD.STI” – турк компанияси фойдасига жами 51 минг 645 АҚШ доллари ундириб бериш кўрсатилган.  

Мазкур ижро ҳужжати Бюронинг Давлатобод туман бўлими иш юритувига олиниб, қарор қабул қилинган ва тарафларга юборилган.  

Аммо, қарздор берилган ихтиёрий муддатда қарзини бартараф этмаган. Иш бора-бора мажбурий ҳаракатга тақалади.  

Шундан сўнг, қарздор жамиятга тегишли тикувчилик маҳсулотларини ишлаб чиқаришга мўлжалланган бино ва иншоотлар белгиланган тартибга кўра хатланган.  

Улар баҳоланиб, электрон онлайн-аукционларни ташкил этиш маркази орқали сотувга чиқарилган. Ўз ўрнида мажбуриятни тушунган қарздор ташкилот бино-иншоотларни реализация қилиш жараёнида қарздорликни бартараф этди. Натижада бўлим томонидан компанияга суд қароридаги сумма ундириб берилди.  

Мафтуна Каримова, ЎзА