Бош прокурорнинг биринчи ўринбосари Б.Валиев бошчилигидаги ишчи гуруҳ томонидан Тошкент вилоятида хорижий инвестицияларни кенг жалб қилиш, экспорт прогнози ижросини таъминлаш борасида амалга оширилаётган ишлар натижалари ўрганилмоқда.

Нурафшон шаҳрида вилоят ҳокимининг ўринбосари Н.Шарипов тегишли масъуллар иштирокида жорий йилнинг биринчи чорагида ўзлаштирилиши режалаштирилган хорижий инвестиция лойиҳаларининг ҳолати ҳамда экспорт прогноз режаларининг бажарилишини муҳокама қилди.

Жорий йилнинг биринчи чорагида вилоятда 104 та лойиҳа доирасида жами 307,7 миллион доллар миқдорида тўғридан-тўғри хорижий инвестицияларни ўзлаштириш режалаштирилган. Шунингдек, 1 миллион 500 минг доллар миқдорида экспортни амалга ошириш белгиланган ва ушбу прогноз ҳозиргача 101 фоизга бажарилган.

Тақдимотда мутасаддиларга лойиҳаларни тармоқ жадвалларида белгиланган муддатларда ишга тушириш, экспорт прогнозлари ижросини тўлиқ таъминлаш ҳамда ушбу соҳаларда самарадорликни янада ошириш юзасидан тегишли кўрсатма ва топшириқлар берилди. Мавжуд камчиликларни тегишли тартибда бартараф этиш бўйича келишиб олинди.  

А.Мусаев,  

ЎзА мухбири