Қатар давлати ахборот агентлиги – QNA Амир Шайх Тамим бин Ҳамад Ол Соний Лусайл саройида Ўзбекистон Республикасининг мамлакатдаги биринчи Фавқулодда ва мухтор элчиси Ашраф Ходжаевдан ишонч ёрлиғини қабул қилгани ҳақида ёзди.

Мамлакатимизнинг Доҳадаги элчихонаси 2023 йил декабрда очилди. Ўтган йил май ойида Тошкентда Қатар дипломатик ваколатхонаси иш бошлаган.

43 ёшли дипломат Тошкент давлат шарқшунослик институти (ҳозирги ТДШУ), Миллий университет ва Пекин университетини тамомлаган. Иқтисодиёт фанлари номзоди (PhD) илмий даражасига эга. Тизимдаги фаолиятини 2005 йил референт сифатида бошлаган. Кейин вазирлик марказий бошқарув тизимида, Нью-Йоркда, Ўзбекистоннинг БМТдаги доимий ваколатхонасида, Буюк Британиядаги элчихонамизда турли лавозимларда ишлаган.

2018 йилдан буён ТИВ Иқтисодий дипломатия департаменти бошқарма, бош бошқарма бошлиғи ва директори сифатида фаолият юритган.

Муҳаррама Пирматова, ЎзА