Шу ойнинг ўн бешинчи санасидан бошлаб, юртимизда аҳоли ва қишлоқ хўжалигини рўйхатга олишнинг онлайн босқичи давом этмоқда.

Ушбу муҳим жараёнда хоразмликлар ҳам фаол иштирок этиб, жойларда аҳолини рўйхатга олиш ишлари самарали ташкил қилиниб, фуқароларга тушунтириш ва амалий кўмак кўрсатилмоқда.  

–  Аслида БМТ тавсиясига кўра, мазкур жараён ҳар бир мамлакатда ўн йилда бир маротаба ўтказилиши лозим, – дейди Хоразм вилоят статистика бошқармаси бошлиғи ўринбосари Ҳакимбой Эгамов. – Президентимизнинг тегишли фармонига асосан юртимизда нафақат аҳоли, балки қишлоқ хўжалигини ҳам қўшиб рўйхатга олиш белгиланган. Шу боис ўтказилаётган тадбирлар мамлакатимиз келажаги учун жуда муҳимдир. Вилоятимизда 509 маҳалла бўлиб, Тупроққалъа туманининг олис ҳудудида жойлашган маҳаллаларда рўйхатга олиш ишлари 2025 йилнинг ноябр ойида якунланган. Қолган 505 та маҳаллада жараёнлар онлайн давом этмоқда. Рўйхатдан ўтиш учун фуқаролар OneID тизими орқали идентификациядан ўтиб, сўнг census.stat.uz портали орқали онлайн рўйхатдан ўтишлари мумкин. Ушбу жараёнда хорижда бўлган ватандошларимиз ҳам иштирок этишлари мумкин.    

Айни пайтда кўпчилик фуқаролар ўзлари мустақил равишда белгиланган тартибда онлайн рўйхатдан ўтмоқда. Бунга бироз қийналадиган юртдошларимиз учун вилоят статистика бошқармасида 24 соат ишлайдиган “КОЛЛ марказ” ташкил этилган. Улар фуқароларда туғилиши мумкин бўлган барча масалаларга телефон орқали жавоб беришади.

–  Менга “OneID” деган тизим, сўнг census.stat.uz портали орқали онлайн рўйхатдан ўтасан. дейишганида озроқ иккиландим, – дейди ураганлик нуроний Отахон Собиров. – Фарзандлар, келинлар ишда, неваралар эса мактабда.  Маҳалламдагилардан статистика бошқармаси номерини топиб қўнғироқ қилдим. Узоғи ўн дақиқада уларнинг кўмаги билан рўйхатдан ўтдим. Етмишдан ортиқ саволларга жавоб бердим. Мамлакатни ижтимоий-иқтисодий ривожлантиришда муҳим бўлган саволлар бор экан. Ўйлайманки, аҳоли ва қишлоқ хўжалигини рўйхатга олишнинг бош мақсади мамлакатдаги аҳоли сони, унинг жинсий ва ёш таркиби, ижтимоий ҳолати, бандлик даражаси, таълим ва турмуш даражаси ҳақида тўлиқ ва аниқ маълумот йиғишдан иборат. Шу билан бирга, қишлоқ хўжалигидаги ер майдонлари, ҳайвонлар тури, деҳқон ва фермер хўжаликлари сони, маҳсулот ишлаб чиқариш ҳажми бўйича ҳаққоний статистик маълумотлар яратилади.  

[gallery-27244]

Урганч шаҳрида аҳолини рўйхатга олиш жараёни ҳам қизғин давом этмоқда. Хусусан, бугунги кунда вилоятдаги барча маҳаллаларда ташкил этилгани каби шаҳарнинг Камолот маҳалласида ҳам маҳалладошларга кўмаклаклашувчи гуруҳ фаолияти йўлга қўйилган.    

–  Маҳалламизда 1500 дан ортиқ фуқаро 500 дан ортиқ хонадонда истиқомат қилади, – дейди маҳалладаги ҳоким ёрдамчиси Даврон Отажонов. –Маҳалла еттилиги аъзоларининг барчасиги кўчалар бириктирилган бўлиб, ушбу ҳудуддан бўладиган мурожаатларни қабул қилади ва шуғулланади. Фуқаролар йиғини биносида ҳам фуқаролар учун шароитлар яратилган. Куннинг исталган пайтида уларга ёрдам берилмоқда. Мабодо, соғлиғи ёки жисмоний имконияти билан муаммоси бор бўлган фуқароларимиз мурожаат қилишса, уларнинг хонадонига бориб, рўйхатдан ўтишларига кўмак бермоқдамиз.  

Шаҳарнинг Жингавуз маҳалласида эса айни пайтга қадар онлайн рўйхатдан ўтган фуқаролар сони 90 фоиздан ошган.  

–  Маҳалламиз аҳолисининг асосий қатлами зиёлилардан иборат, – дейди маҳалла хотин - қизлар фаоли Нигора Қиличева. – Шу сабабдан мазкур жараёнлар бизга унчалик қийинчилик туғдираётгани йўқ. Аҳоли ва қишлоқ хўжалигини рўйхатга олиш бўйича ўзимиз ҳам уч марта ўқидик. Тарғибот ишларини фаол олиб бордик. Ижтимоий тармоқларда маҳалламиз аҳолиси учун очилган гуруҳлар мавжуд. Бизга мурожаат ва саволлар асосан ижтиомий тармоқлар орқали келиб тушади. Ҳозир мулки бизда, лекин ўзи бошқа жойда ёки оилавий хорижда бўлган маҳалладошларимиз билан боғланиб, уларнинг ҳам рўйхатдан ўтишларини таъминламоқдамиз.

Хоразм вилоятининг барча маҳаллаларида аҳоли ва қишлоқ хўжалигини рўйхатдан ўтказишга қаратилган муҳим тадбирлар давом этмоқда.

<iframe width="640" height="420" src="https://www.youtube.com/embed/wpl8LUAZH5Q" title="Xorazmliklar aholi va qishloq xo‘jaligini ro‘yxatga olish jarayonlarida faol qatnashmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Аҳмаджон Шокиров,

Беҳзод Саидов (сурат, видео), ЎзА мухбирлари