Хабарингиз бор, Бирлашган Араб Амирликларининг Дубай шаҳрида ташкил қилинган V ёшлар Пара Осиё ўйинлари (Asian Youth Para Games - Dubai 2025)да ўзбекистонлик пара спортчилар юксак кўрсаткичлар қайд этишди.  

Унда ҳамюртларимиз беллашган ҳар бир спорт тури бўйича кўп марта олтин, кумуш ва бронза медаллари билан тақдирландилар.   

Спорт делегациямиз жамғармасини Хоразм вилояти Спортнинг ўйин турлари ва енгил атлетика бўйича ихтисослаштирилган  спорт мактаби пара енгил атлетикачиси Йўлдошбек Ҳажиев ҳам ўзининг энг юқори қийматли учта медали билан бойитди. Хусусан, у ўн етти ёшгача бўлган (U-17) пара спортчиларнинг F-40/41 синфида ядро, диск ва найза улоқтириш  баҳсларида рақибларига имконият қолдирмасдан, учта олтин медалнинг эгасига айланди.

Натижада хоразмлик атлет ёшлар Пара Осиё ўйинларининг уч карра чемпиони сифатида тарихга кирди. 

—Мазкур мусобақада қитъамизнинг 35 давлатидан 1500 нафарга яқин пара атлет иштирок этди,—дейди хоразмлик мураббий  Алибек Аҳмедов. — Ўзбекистон делегацияси 124 нафар спортчидан иборат бўлди.  Спортчиларимиз 6 та спорт турида – пара енгил атлетика, пара таэквандо, пара боча, пара сузиш, пара армрестлинг ва пара пауэрлифтинг бўйича ғолиблик учун курашди. Терма жамоамизнинг пара енгил атлетикачиси Йўлдошбек Ҳажиевнинг ютуқлари нафақат Хоразм вилояти, балки бутун Ўзбекистон спорт жамоатчилиги учун катта ғурур ва илҳом манбаи бўлди.

Таъкидлаш жоизки, бундай юқори натижалар мамлакатимизда пара спортни ривожлантиришга қаратилаётган эътиборнинг амалий самарасидир. 

Аҳмаджон Шокиров, ЎзА