Хабар берганимиздек, Тошкентнинг “Ҳумо” хоккей клуби жорий мавсумда Қозоғистон чемпионатида иштирок этади.

Шу муносабат билан жорий йилнинг 24 август — 1 сентябрь кунлари чемпионат олдидан Қозоғистон кубоги баҳслари ташкил этилади. Унда иштирок этадиган ҳумочилар бугун, 23 август куни Қозоғистонга жўнаб кетди.

Ҳамюртларимиз Қозоғистон кубогидаги илк ўйинни эртага, 24 август куни қўшни мамлакат чемпионатининг амалдаги ғолиби "Сариарка" (Караганда) жамоасига қарши ўтказади.  

Айтиш лозимки, Қозоғистон кубогида жамоалар учта гуруҳга бўлинган ҳолда баҳсларда қатнашади. "Ҳумо" жамоаси "А" гуруҳида "Сариарка", "Актобе" ва "Кулагер" жамоалари билан беллашади.

Айтиб ўтганимиздек, Тошкент жамоаси илк ўйинда "Сариарка"га рўбарў келса, 26 август куни Актобенинг “Актобе”си билан, 28 август куни эса Петропавловскнинг “Кулагер” жамоаси билан баҳс олиб боради.

Эслатиб ўтамиз, “Ҳумо”нинг Тошкентдаги илк ўйини 11 сентябрь куни бўлиб ўтади.  

Т.Рўзиев, ЎзА