Andijon viloyati Baliqchi tumani “Omonariq” mahalla fuqarolar yig‘inida faoliyat olib borayotgan hokim yordamchisi Hayotbek Hojimurodov 2022 yilda amalga oshirgan ishlari va joriy yildagi rejalari bo‘yicha mahalla aholisiga hisobot berdi.

Mahallada 5 ming 400 nafardan ziyod aholi istiqomat qiladi. 2022 yil boshidagi o‘rganishlar natijasida 72 nafar ayol “Ayollar daftari” ga, 24 nafar yigit-qiz “Yoshlar daftari” ga kiritildi. Bundan tashqari, 400 nafardan ziyod ishsiz fuqarolar borligi, shuningdek, mahalla infratuzilmasini yaxshilash bo‘yicha qator muammolar aniqlangan edi.  Ana shu muammolarni, “Ayollar daftari” va “Yoshlar daftari” ga kiritilgan fuqarolarni qiynayotgan masalalarni bartaraf etish bo‘yicha mahalla raisi, xotin-qizlar faoli hamda mutasaddi tashkilotlar bilan hamkorlikda tizimli ishlar olib borildi.  

[gallery-10512]

– 2022 yilda mahallamizda 349 nafar mehnatga layoqatli, ishsiz aholining bandligi ta’minlandi, – deydi hokim yordamchisi Hayotbek Hojimurodov. – Bundan tashqari, mahallada 145 ta loyihani amalga oshirish uchun qariyb 1,5 milliard so‘m imtiyozli kredit ajratildi. Shuningdek, ijtimoiy himoyaga muhtoj aholiga moddiy, tibbiy va boshqa yordamlar ko‘rsatildi. Mahalla infratuzilmasini rivojlantirish borasida ham e’tiborga molik ishlar olib borildi. Mahalladagi 1 ming 145 metrli Uch sohil ko‘chasi to‘liq, shuningdek, Zuhro yulduz ko‘chasining 955 metr qismi, jami 2,1 kilometr yo‘lga asfalt-beton yotqizildi. 2,3 kilometr masofaga ichimlik suv tarmog‘i tortildi, elektr energiyasi ta’minotini yaxshilash maqsadida 60 dona beton tayanch ustunlar o‘rnatildi.  

– Prezidentimizga, hukumatimizga rahmat, – deydi Uch sohil ko‘chasida yashovchi, mehnat faxriysi Halimjon ota O‘rinov. – Birgina o‘tgan yilning o‘zida mahallamiz ahlini yillar davomida qiynab kelayotgan qator muammolar bartaraf etildi. Bu ishlarni amalga oshirishda mahallamiz yetakchilari, ayniqsa, shijoatli hokim yordamchisining alohida xizmati bor.  

Hokim yordamchisi joriy yil rejalari bo‘yicha ham mahalla ahli bilan o‘rtoqlashdi.  

F. UBAYDULLAEV, Z. UMRZOQOV (surat), O‘zA.