Бухоро вилоятининг 544 та маҳалла фуқаролар йиғинларида фаолият юритаётган ҳоким ёрдамчилари томонидан аҳоли турмуш даражасини юксалтириш мақсадида асосий драйвер йўналишлар белгилаб олинган. Эндиликда ёрдамчилар томонидан маҳаллаларда чорвачилик, паррандачилик, асаларичилик, иссиқхоначалик, деҳқончилик, боғдорчилик, хизмат кўрсатиш йўналишлари ривожлантирилмоқда.

Ромитан туманидаги 1-секторга қарашли “Қалайчорбоғ” маҳалла фуқаролар йиғини аҳолисини иш билан банд қилиш, доимий даромадли бўлишини таъминлаш ва тадбиркорликка жалб қилиш мақсадида ҳоким ёрдамчиси томонидан “Микрокредит банк” АТБ туман филиалидан имтиёзли кредит асосида 42 та оилага жами 57 бош қорамол, 10 та хонадонга 50 та қўй, 8 та оилага 400 бош парранда тарқатилди. 4 та хонадон томорқа ер майдонида 9 сотих иссиқхона ташкил этилди.

–  Ўзимизга бириктирилган маҳаллани обод қилиш, фуқаролар учун зарур шароитларни яратиб бериш, уларнинг бандлигини таъминлаш ва тадбиркорликка жалб қилиш асосий мақсадимиздир, – дейди ҳоким ёрдамчиси Замир Бахшуллаев. – Ушбу ташкиллаштирилган ишлар маҳаллаларнинг иқтисодий юксалишига, камбағалликни қисқартиришга, аҳоли фаровонлигини оширишда муҳим аҳамият касб этади. 

Зариф Комилов, ЎзА