Тошкент вилояти ҳокими Зойир Мирзаев Оҳангарон тумани “Янги ҳаёт” МФЙ ҳудудида хитойлик тадбиркорлар томонидан амалга оширилаётган қаттиқ маиший чиқиндиларни ёқиш орқали электр қуввати ишлаб чиқаришга қаратилган йирик инвестициявий лойиҳанинг қурилиш ишлари билан танишди.

Жараёнда Хитойнинг “China CAMC Engineering” компанияси вакиллари томонидан лойиҳа тақдимоти ўтказилиб, заводнинг қуввати, технологик жараёнлари, экологик хавфсизлик чоралари ҳамда амалга оширилаётган қурилиш ишларининг жорий ҳолати ҳақида батафсил маълумот берилди. 

Мазкур лойиҳа Президентимизнинг тегишли қарорига мувофиқ амалга оширилиб, унга 240 миллион АҚШ доллари миқдорида тўғридан-тўғри хорижий сармоя жалб этилган. Корхонада йилига 912 минг тонна (кунига 2,5 минг тонна) қаттиқ маиший чиқиндилар термик усулда қайта ишланиб, 390 миллион киловатт соат электр қуввати ишлаб чиқариш режалаштирилган. 

Вилоят ҳокими қурилишдаги жорий ҳолат билан танишар экан, лойиҳанинг ҳозирги экологик вазиятни ҳисобга олган ҳолда алоҳида аҳамиятга эга эканини таъкидлади. Шунингдек, лойиҳани амалга ошириш бўйича юзага келадиган масалаларни ҳал этишда вилоят ҳокимлиги доим кўмакка тайёр эканини ҳам маълум қилди. 

Зойир Мирзаев корхона атрофида экосаноат зонасини шакллантириш имкониятларига ҳам тўхталиб, келгусида ушбу ҳудудда турли саноат корхоналарини жойлаштириш, шу орқали янги иш ўринлари яратиш ва ҳудуднинг иқтисодий салоҳиятини ошириш бўйича таклифларини илгари сурди. 

Маълумотларга кўра, мазкур ҳудуддаги 14,7 гектар ер майдонида экосаноат зонаси ташкил этиш белгиланган бўлиб, шундан 12 гектарида завод қурилиши бошланган. Ҳозирги кунда қурилиш ишларига 30 тадан ортиқ махсус техника ва 200 нафарга яқин ишчи-хизматчилар жалб этилган. Топографик-геодезик тадқиқот ишлари ва ер майдонларини текислаш жараёнлари тўлиқ якунланган. 

Айни пайтда заводнинг асосий биноси учун пойдевор ишлари, ҳудудни девор билан ўраш, вақтинчалик модулли биноларни жойлаштириш ҳамда асосий технологик ускуналарни харид қилиш ишлари режага мувофиқ амалга оширилмоқда. 

Шу кунларда лойиҳани жадаллаштириш бўйича хорижий инвестор ҳамда тегишли вазирлик ва идоралар билан ҳамкорликда тизимли ишлар олиб борилмоқда. 

А.Мусаев, ЎзА.