Пайшанба куни Парижда Президент Эммануэль Макрон ва Буюк Британия Бош вазири Кир Стармер раислигида “Хоҳловчилар коалицияси” деб аталган тузилма йиғилиши бўлиб ўтди.

"Блумберг" ёзишича, иштирокчилар Украинанинг ҳарбий қобилиятини мустаҳкамлашга келишиб олишган. Саммитдан сўнг Президент Владимир Зеленский шундай баёнот берди:

- Ҳар бир давлат қуруқликда, денгизда, ҳавода ва кибер фазода хавфсизликни таъминлашга ҳисса қўшишга тайёр бўлиши масаласини батафсил кўриб чиқдик. Ёндашувларни мувофиқлаштирдик ва хавфсизлик кафолати таркибий қисмини муҳокама қилдик. Хавфсизликнинг асосий кафолати кучли Украина армияси эканлигини тушунганликлари учун ҳар бир ҳамкоримизга миннатдорлик билдираман. Бизда умумий тушунча бор: Россия Федерацияси эҳтимолий барча жараёнларни сақлаб қолиш ва урушни давом эттириш ниятида. Шу боис Украинани қўллаб-қувватлашни кучайтириш ва Россияга нисбатан босимни кучайтириш керак. Ҳозир Япония ҳам санкция бўйича ишламоқда.

Макрон ҳам Зеленский билан бирга ўтказган қўшма матбуот анжуманида 26 давлат уруш тугагандан кейин Украина хавфсизлигини қуруқликда, денгизда ва ҳавода таъминлаш учун қўшин юбориш ниятидалигини айтган. Унинг сўзларига кўра, ниҳоят яқин кунларда АҚШнинг хавфсизлик кафолати аниқланади.

Аввалроқ “The Washington Post” газетаси Трамп Украина хавфсизлиги эҳтимолий кафолатида АҚШнинг ўрни ҳақида ҳали қарор қабул қилинмагани хусусида гапирганини ёзганди.

С.Раҳимов, ЎзА