Таъкидланганидек, Хитойнинг “JACK” компанияси глобал тикувчилик саноатидаги энг йирик ишлаб чиқариш ва маркетинг корхоналаридан бири. Тўқимачилик саноати учун ақлли платформа сифатида “булутли технологиялар” миллий рўйхатига киритилган. Компания томонидан Чжэцзян провинциясида илғор ақлли ишлаб чиқариш тизимини яратиш бўйича илк “келажак фабрикаси” лойиҳаси амалга оширилган.

“JACK” компаниясининг Ўзбекистон билан ҳамкорлик қилиб келаётганига 12 йилдан ошди. Ҳозирги кунда ҳам мамлакатимиз билан савдо-сотиқ ишлари давом этмоқда.  

“JACK” компанияси ўз маҳсулотларини рақамлаштиришга интилади.  Хусусан, компания томонидан тикувчилик саноатини рақамлаштиришга катта аҳамият қаратилмоқда. Компания яқинда тикув машиналари брендининг янги авлодини тақдим этди.  

Ҳозирда жойларда ушбу бренд тарғиботига бағишланган тадбирлар ўтказилмоқда.  

Тадбирда JACK  А5 ЕА модели дея таърифланувчи ушбу тикув машиналарининг бренднинг аввалги авлод тикув машиналаридан фарқи, афзалликлари ҳақида компаниянинг Ўрта Осиёдаги координатори ва унинг Ўзбекистондаги вакили йиғилганларга батафсил маълумот берди.  

–Биз ҳафта мобайнида Бухоро вилоятидаги тикувчилик фабрикалари, тўқимачилик корхоналари, шу билан бирга, якка тартибда тикувчилик фаолияти билан шуғулланиб келаётган хотин-қизлар ўртасида тарғибот-ташвиқот ишларини олиб бордик, – дейди “JACK” компаниясининг Бухородаги дилери Алишер Аббосов. – Роботлаштирилган янги авлод тикув машинасининг ишлатиш услубларини кенг тушунтирдик. Бугун эса умумжамоа билан шу мавзуда мулоқот қилдик. Бундан асосий мақсад, биринчидан, тикув машиналари савдосини амалга ошириш бўлса, иккинчидан, тикувчилик билан шуғулланувчи опа-сингилларимизнинг машаққатларини енгиллаштириш орқали уларнинг иш унумдорлигини оширишдан иборат.  

Тақдимот тадбирида вилоят ҳокими Ботир Зарипов ҳам иштирок этди. Вилоят раҳбари давлатимиз томонидан хотин-қизларга кўрсатилаётган эътибор ва ғамхўрликлар ҳақида тўхталиб, тикув машиналарини субсидия орқали харид қилишга кўмаклашишга тайёрлигини билдирди.  

Зариф Комилов,  

ЎзА